KEH TAQEH AJABʼEES
6. Qʼilariik taqeh halakʼun
¿CHAJARIK IRAAJ RUQʼOROM?
Reʼ qʼilooj irukʼam cho: rukʼamariik kibʼeeh, rukʼuhtjiik keh, eh wilik pech kikʼuhbʼaljiik noq maʼ holohik ta i kinaʼojbʼal. Xa reʼ laʼ, koruman rukojariik kinaʼojbʼal reh chi ne inkibʼan i holohik pan kikʼachariik.
¿CHAJ WOʼ REET KORUMAN?
Chupaam taqeh haabʼ wilih, reʼ qʼilooj maʼ inkikapaaj ta chik rubʼanariik taqeh ajabʼees, ruum chi kiyoʼjiik chi ne inkitiʼbʼisaj rukʼux i kihalakʼuun. Xa reʼ laʼ, reʼ taqeh ajabʼees qʼeʼ atoobʼ inkikoj runaʼojbʼal i kihalakʼuun reh chi ne inkikoj eh chi holohik i kikʼachariik.
«Reʼ taqeh halakʼun koruman chi ne inkinabʼeej chajarik i wilik qʼabʼ keh chi bʼanarik reh chi wilik kinaʼojbʼal noq nimaq chik taqeh. Mi maʼ jeʼ reʼ, jeʼ kikabʼ i barco maʼxta rutimón: chi qʼun qʼun ne inkisaj kiibʼ eh ne inwihʼik kikʼaxkilaal» (Pamela).
¿CHAJARIK NE NABʼAN?
Matqʼuhtik chi kiqʼilariik. Mi reʼ ahalakʼuun maʼ tirunimaj ta, chaqʼor rubʼehel reh chi ne inchalik kʼaxkilaal ruukʼ i rubʼanooj. Eh mi xatrunimaj chayeew rusuqkiil rukʼux.
«Ruum chi yuʼnaak reʼ taqeh halakʼun maʼ kinimanik ta chik, reʼ hin juneliik inuyeew rusuqkiil kikʼux taqeh nuhalakʼuun noq kinimanik. Jeʼ reʼ maʼ kʼaxik ta rukʼulariik i qʼilooj inkibʼan noq ajwaal wach chi keh» (Christine).
NAʼOJBʼAL REH I SANTO LAJ HUUJ: «Chakoj taq rehtaal ahaʼ wilik intikarik reʼ woʼ chik i reʼ injacharik» (Gálatas 6:7).
Wilik oq anaʼojbʼal. Noq ne naqʼil ahalakʼuun chakoj pan ruman i ruhabʼil, i ransil eh i runimaal i kʼaxkilaal. Reʼ qʼilooj inelik korik noq reʼ keh, inkikoj rehtaal chi reʼ xkibʼan maʼ holohik ta. Jenaj ehtalil, mi reʼ awakʼuun maʼ runimaj ta noq reʼ hat xaqʼor chi maʼ ne ta irukoj i celular, mareh maʼ ne ta chik inayeew qʼabʼ reh chi ne rukoj. Jeʼ reʼ noq mabʼan chi nim i kʼaxkilaal wilih.
«Peet inunabʼeej mi reʼ wakʼuun xa maʼ xraaj ta nimanik on chi maʼ rehtaal ta noq xubʼan. Maʼ jenaj ta wach ruqʼilariik noq maʼ holohik ta i runaʼojbʼal chuwach rutobʼjiik noq maʼ rehtaal ta i xubʼan» (Wendell).
NAʼOJBʼAL REH I SANTO LAJ HUUJ: «Jeʼ woʼ taq i hat tuutbʼees ajaabʼees, maa kaqrisaj taq awakʼuun awixqʼuun chi xamaʼ xta rubʼehel, reh chi maʼ nee ta ntukinik wach o intiʼbʼik kikʼux» (Colosenses 3:21).
Hat oq ajkʼaxool. Mi reʼ hat inaqʼil taqeh ahalakʼuun ruukʼ kʼaxooj, reʼ keh ne inkikoj rehtaal eh maʼ ne ta inkikʼaxkileej rujalariik wach i maʼ holohik ta naʼojbʼal.
«Noq reʼ qakʼuun irubʼan jenoʼ naʼojbʼal maʼ holohik ta, inqaqʼor reh chi suq naq qakʼux ruukʼ, xaʼ reʼ laʼ yuʼnaak reʼ naʼojbʼal xubʼan maʼ holohik ta. Ruum koruman chi ne naq irujal wach eh chi reʼ hoj ne naq inqatobʼeej» (Daniel).
NAʼOJBʼAL REH I SANTO LAJ HUUJ: «Reʼ wilik kʼaxooj ruukʼ neerukuy rukʼulariik i tiʼ neenbʼaan reh, xa atoobʼ wach rukʼux» (1 Corintios 13:4).
