YAYAUNAJ
6. Huahuaunara camachisha libachina
¿IMARA AN?
Camachisha libachina anmi huahuaunara pushangaj, yachachingaj, huaquimbi paiguna manali rashcara dirichungaj. Astaumbas huahuaunara imasna ali decisiongunara apingaj yachachina an mana pandaringahua.
¿IMARASHA VALISHCA AN?
Puchucai huataunai camachisha libachina chingarishca, yayauna manzhai charinun paiguna huahuauna llaqui sintirinuchu. Shinajpi ali yayauna ali iyaiyuj mandashcaunara paihua churiunara cunun, astaumbas casungahua yachachinun.
“Huahuauna mandashcauna ministinun ali iyaiyuj runauna tucungahua. Manajpi, paiguna shu canua tauna remo illashca cuinta tucununga, maicambi maitas risha vultianunga” (Pamela).
¿IMARA RURANA USHANGUI?
Ali rurai. Camba churi mana casujpi ricuchingui imara tucunga mana casushcamanda. Shinajpi camba churi casujpi, felicitangui.
“Cuna mana pis casunun, chiraigu ñuca huahuauna casunujpi ashcara felicitani. Shina rurasha ministishca libachinara apingaj mas ahualla an paigunaj” (Christine).
BIBLIAMANDA IYAI: “Imaras shu runa tarpusha chillarara pallangami” (Gálatas 6:7).
Ali iyaiyuj ai. Camba churira camachisha libachingaj iyaringui masna huata charishcara, masna rurana ushashcara, imai pandarishcara. Libachina pai manali rurashcamanda an. Shu ejemplo churasha, camba churi can mandashca celular utilizanamanda mana casujpi ña celularda utilizangaj mana saquingui ansa timpumanda. Shinajpi ichilla pandarishcaunamanda mana yapajta piñaringuichu.
“Tucui huras ricungaj ursarini ñuca churi munasha mana casushcara, maicambi pandarishcallara. Mana chillarachu an ñuca churira camachisha libachingaj manalira ruraj ashcamanda, o maicambi paita yanapangaj intindichichu pandarishcara” (Wendell).
BIBLIAMANDA IYAI: “Yayauna, canguna churiunara ama yapajta piñachinguichichu, paigunara ama llaquichingaj” (Colosenses 3:21).
Llaquishcara ricuchi. Camba churiunara llaquishcahua camachisha libachisha paiguna caita ricununga, astaumbas mas ahuallachu anga camba libachinara apingaj ña mana cuti pandaringaj.
“Ñucanchi churi pandarijpi tucui huras ricuchicanchi ñucanchi cushi sintirinchi pai ali ajllashca decisiongunamanda. Paita intindichicanchi pai pandarishcara alichishaga shuj runauna ali ricununga, astaumbas ñucanchis paita yanapashun” (Daniel).
BIBLIAMANDA IYAI: “Llaquina unaira chapanmi, ali shunguyujmi” (1 Corintios 13:4).
