Ko te akoanga, koia oki kia arataki me kore kia apii. I tetai au taime, te kapiti maira te akatikatika anga i te tu o tetai tamaiti. E ka ō katoa mai te apiianga i te tu tau kia kite te tamaiti akapeea me rave i te au ikianga meitaki.

I te au mataiti i aereia mai, kare tetai au ngutuare e ako ana i ta ratou tamariki no te mataku o te au metua e ka akaiti te reira i te manako papu o te tamariki. Inara, ka akanoo te au metua pakari i te au ture e ka tereni i ta ratou tamariki kia aru i te reira.

“Ka anoanoia te tamariki kia kite eaa ta ratou ka rave me kore kare e rave, kia maata mai ei tangata meitaki. Me kare e akoanga, ka aite te tamariki mei tetai pai kare ona oe​—ka panu aere ua me kore ka takauri.”​—Pamela.

Rave putuputu. Me kare taau tamaiti e akarongo ki taau ture, e akanoo i tetai akautunga anga. E me akarongo aia ki taau ture, e akameitaki iaia.

“E akameitaki putuputu ana au i taku tamariki no to ratou tu akarongo i roto i teia ao akarongo kore. Ka tauturu teia ia ratou kia āriki i tetai ua atu akoanga ka orongaia kia ratou.”​—Christine.

KAVEINGA PIPIRIA: “Ko ta te tangata e ruru ra, ko tana ra ïa e kokoti.”​—Galatia 6:7.

Kia tau ua. Kia tau taau akoanga ki te mataiti o te tamaiti e ki tana i mārama. Ka puapingaia taau akautunga anga tei akanooia ki runga i te tarevake​—ei akaraanga, me kare aia e akarongo ki taau i akanoo no te taangaanga i te tereponi, ka ngere aia i te reira no tetai tuatau. Auraka e riri no te au mea rikiriki ua nei.

“Me akarongo kore taku tamaiti, ka akamanako meitaki au me e akakoro nana me e tarevake ua. E tuke te tu akakoro te ka anoano kia akatanoia ki te tarevake kia akakiteia.”​—Wendell.

KAVEINGA PIPIRIA: “Auraka e akariri atu i ta kotou tamariki, ko te taitaia aea ratou.”​—Kolosa 3:21.

Akaari i te aroa. Ka rauka i te au tamariki i te āriki e te akarongo i te au akoanga a te metua me kua akatumuia ki runga i te aroa.

“Me rave ta maua tamaiti i te tarevake, ka akakite maua kiaia i to maua rekareka no te au ikianga meitaki tana i rave i mua ana. Ka akamārama maua e kare tana tarevake e takino i tona ingoa me rave aia i te au akatikatika anga tau e ka tauturu maua iaia.”​—Daniel.

KAVEINGA PIPIRIA: “E akakoromaki anga roa to te aroa, e te takinga-meitaki.”​—1 Korinetia 13:4.