Тэ сытярэс лэ бэятос, када тэ росԥэнэс, сар во трэбуй пэс тэ андярэл. Дэкала, кала о бэято на полэл, трэбуй наказывать, кай во тэ андярэл пэс па аврятэ. Но часто, кала сытярэс лэ бэятос, трэбуй тэ поможыс лэсти тэ полэл, со драго, ай со найдраго, кай во екжэно тэ сможэт тэ витидэл кода, со правильно.

Андэ послидни бэрша дэсавэ родителя почти парашэлэ тэ сытярэн пэстирэ бэятонэн важ кода, кай пэрэжывают, кай и бэяцэ лэна тэ гиндон пала пэстэ, кай вонэ нисо на ашэн. Но кодэла, ко па чачимастэ диқэн пала пэстирэ бэяцэ, приԥэнэн лэнди со можно, ай со нащи и ԥэнэн лэнди тэ терэн кадя, сар лэн сытярдэ.

«Кай о бэято тэ барёл лашэ манушэса, во трэбуй драго тэ ӷэнэн, со можно, ай со нащи. Если тэ на сытярэс лэ бэятос кадя, сар трэбуй, во авэла, сар о кораблё би рулёско. Через када можэт тэ авэл бида» (Памела).

Сытяр, кала трэбуй, но и хвалисар лэ бэятос. Если о бэято на терэл кадя, сар сас ԥэндо, тер варисо. Авря ригатар, если во андярэлас пэс драго, похвалисар лэс.

«Мэ часто хвалисарав пэстирэ бэятонэн, кай вонэ кандинэ, важ кода кай адес кацаво почти нинай. Кала хвалис, када поможыя май вушэро тэ прилэн и наказания, кала вой авэла трэбуй» (Кристин).

БИБЛЕЙСКО ПРИНЦЫПО. «Со посадия о мануш, кода и вибарёла» (Галатам 6:7).

Ав мудро. Трэбуй тэ сытярэс лэ бэятонэн па лэндирэ бэрша и па кода, со вонэ моӷут тэ терэн. Кала ту сразу сытярэс лэ бэятос посли кода, кай во варисо най кадя стердя, када анэна бут лашимос. Если о бэято на кангля андэ кода, со ту ԥэндян важ о телефоно, тоди приԥэн лэсти, скати время во можэт тэ бэшэл андо телефоно и со тэ диқэл. Но никала на сытярэл лэ бэятос, кала тутэ пэр лэстэ исин холи, важ кода кай во пэс найдраго андярдя.

«Мэ старысавав тэ полав, мэрно бэято спецыально ман на кангля или просто шылисайля. Исин бари разница машкар кода, со трэбуй тэ улэс анда характеро и ошыбка, пэ сави трэбуй просто тэ шос сама» (Уэндэло).

БИБЛЕЙСКО ПРИНЦЫПО. «Дада, на холярэн пэстирэ бэятонэн, кай вонэ тэ на умэкэн и вас» (Колоссянам 3:21).

Кала сытярэс, сыкав, кай любис. Лэ бэятонэнди май вушэро тэ сытён, кала вонэ ӷанэн, кай о дад и дэй лэн любин.

«Кала амаро шаво андэ варисо шылияспэ, амэ ԥэнасас лэсти, кай любисарас лэс и, кай во ужэ най еқвар прилэлас бут лашэ ришэнии. Амэ росԥэнасас, кай если во старыияпэ тэ парудёл, тоди через кода, со во стердя най кадя, пала лэстэ на лэна найдраго тэ гиндон авэр. Посли када амэ ԥэнасас, кай поможысараса лэсти» (Дэниело).

БИБЛЕЙСКО ПРИНЦЫПО. «И любовь ӷанэн тэ тэрпий и вой добро» (1 Коринфянам 13:4).