MO MĀTUA
6: Aʻoaʻiga
LE UIGA O AʻOAʻIGA
O le upu aʻoaʻiga e mafai ona uiga atu i le taʻitaʻia po o le aʻoaʻoina. I nisi taimi e aofia ai foʻi le faasaʻoina o se mea sesē na faia e se tamaitiiti. Peitaʻi o le tele o taimi e aofia ai le saunia o toleniga tau amio lea e fesoasoani i le fanau e faia ai filifiliga atamai.
LE TĀUA O AʻOAʻIGA
I tausaga e leʻi leva atu, ua amata ona mou atu aʻoaʻiga i nisi aiga, ona e fefefe mātua ina neʻi iai i le tamaitiiti ni faalogona e leai sona aogā. Peitaʻi o mātua atamamai e latou te faataatitia ni tapulaa talafeagai ma aʻoaʻo fanau ina ia usitaʻia na tapulaa.
“E manaʻomia e fanau taʻiala ina ia fesoasoani iā i latou e avea ma tagata matutua ua uma ona aʻoaʻoina. Pe a lē avatua ni aʻoaʻiga i fanau, o le a latou faia ni filifiliga sesē ma iʻu atu ai i ni āuga leaga.”—Pamela.
MEA E MAFAI ONA E FAIA
Ia maumauaʻi. Pe a lē usitaʻia e lau tama au tapulaa, ia faamautinoa atu e iai āuga leaga e iʻu i ai. I le isi itu, ia nofosauni e avatu le faamalō i lau tama pe afai e na te usitaʻia na tapulaa.
“E masani ona ou faamalō atu i laʻu fanau ona o lo latou usiusitaʻi, o se uiga ua seāseā faaalia i lenei lalolagi. O le avatu o se faamalō e faigofie ai ona latou talia aʻoaʻiga pe a manaʻomia.”—Christine.
MATAUPU SILISILI FAALE-TUSI PAIA: “O le mea e lūlūina e le tagata, o le mea lava lea e na te seleseleina mai.”—Kalatia 6:7.
Ia magafagafa. Pe a avatu aʻoaʻiga ia iloilo le tausaga o le tamaitiiti, lona tomai ma le matuiā o le mea sesē na fai. E telē le aogā pe a fesootaʻi atu le aʻoaʻiga i le mea sesē. O se faataʻitaʻiga, pe afai e faaaogā sesē e le tamaitiiti le telefoni feaveaʻi e mafai ona aveese le telefoni pe faatapulaa foʻi le faaaogāina. I le taimi e tasi, ʻalofia le ita i mea e lē tāua tele.
“Ou te taumafai e iloa pe na lē usiusitaʻi ma le loto iai laʻu tama pe e leʻi mafaufau lelei i lana filifiliga. E iai le eseesega o le faaauau pea ona faia o se mea sesē ma se gaoioiga e manaʻomia ona faasaʻo.”—Wendell.
MATAUPU SILISILI FAALE-TUSI PAIA: “Aua le faaonoono i a outou fanau, ina neʻi lotovaivai i latou.”—Kolose 3:21.
Ia alofa. O le a sili ona faigofie i fanau ona talia ma faatatauina aʻoaʻiga, pe afai e latou te iloa o le uunaʻiga autū e faia ai faapea e mātua, o le alofa.
“Pe a faia e le ma tama ni mea sesē, na ma faamautinoa atu iai lo ma fiafia tele i ana filifiliga lelei i taimi ua teʻa. Sa ma faamatala atu e lē mafai e na mea sesē ona faaleagaina ai lona talaaga seʻi vaganā ua ia faia suiga manaʻomia ma e ma te iai pea ina ia fesoasoani iā te ia e faia faapea.”—Daniel.
MATAUPU SILISILI FAALE-TUSI PAIA: “E faapalepale ma e agalelei le alofa.”—1 Korinito 13:4.
E te Ono Fiafia Foʻi
LE OLOMATAMATA
E Faapefea Ona Aʻoaʻi Lau Fanau?
Ua faamatalaina e le Tusi Paia auala e 3 e mafai ona aogā ai aʻoaʻiga.
ALA MAI!
Aiseā ua Manatu Māmā ai Tagata i Aʻoaʻiga?
Pe e iai pea se aafiaga o se suiga na amata mai i vaitausaga o le 1960, i le auala e aʻoaʻi ai e mātua fanau i aso nei?
LE OLOMATAMATA
