HOAHY TY RAE AMAN-DRENE
6: Mahaia Magnanatse
INO TY DIKA IZAY?
Va’e hidika tihoe mampianatse ndra magnomey tari-dalagne tihoe magnanatse. Fa magnanatse ty ana’o rehe naho fa magnitsy aze amy ze raha tsy mete atao’e. Faie mateteke magnampe i ajajay hahafantatse ty toko’e hatao’e ty dika io.
NAGNINO ZAY RO TENA ILAEGNE?
Manjare tsy tea magnanatse ty ana’e o rae aman-dreneo tato ho ato. Matahotse iareo kera tsy hatoky tegna sasa i ana’ey. Mahilala o rae aman-dreneo naho magnomey fitsipike hoahy ty ana’e sady magnampe iareo hankatò izay. Faie tsy toko’e ho losotse loatse ty fitsipike meigne iareo.
“Toko’e hampahafantaregne o ajajao ty toko’e hatao’e naho ty tsy toko’e hatao’e. Ho matotse soa iareo amy izay naho fa bey. Ho diso lalagne o sambò naho tsy misy voalà’e sady va’e hivalike aza. Hoe izay ka ty hiafara ao ajajao naho tsy anaregne.”—Pamela.
INO TY AZO’O ATAO?
Ko miovaova. Ko engagne amy izao avao o ajajao fa sazeo naho tsy magnorike ty fitsipike napetra’o. Faie derao reke naho fa mankatò.
“Tsy le tea mankatò o ndatio tie amy izao. Mateteke raho midera ty anako satria tsy hoe izay iareo. Manjare mora ahitsy iareo tie amy izay naho fa misy raha tsy mete atao’e.”—Christine.
TORO LALA TY BAIBOLY: “Ze tongise o ndatio avao ro hovokare’e.”—Galatianina 6:7.
Mahaia manahatsahatse. Naho fa misy raha tsy mete atao ty ana’o, le henteo tie azo leferegne vao i rahay sa tsy azo leferegne, naho henteagne ty tao’e ndra ty fahaiza’e. Mete i sazey naho misy ifandrambesa’e amy i raha tsy mete natao’ey. Va’e nifetrae’o ohatse ty fotoagne ampiasa ty ana’o telefony. Naho tsy mankatò reke le ko engagne hampiasa telefony hey. Faie ko sarotsarote’e amy ty raha tsy le misy dika’e.
“Naho tsy nankatò ty anako, le henteako hey tie satrie’e vao i rahay sa tsy satrie’e. Rehafeko avao reke naho fahadisoagne tsy nisatrie’e i rahay. Faie sazeako reke naho raha fa nirehafagne aze i rahay faie mbe atao’e avao.”—William.
TORO LALA TY BAIBOLY: “Ko magninje o ana’areò, tsy mone hamoe fo avao iareo.”—Kolosianina 3:21.
Mikezaha ho bey hatea. Ho mora amo o ajajao ty hagneke i sazey naho tsapa’e tie tena tea aze o rae aman-dreneo kanao mandilo aze.
“Nisy fotoagne i ana-dahi’aỳ nanao raha tsy nimete. Nirehafe’ay tama’e fa tena nahafale anay ty raha soa natao’e taloha. Nihazavae’ay tama’e ka fa tsy ho raty laza reke naho magnitsy i hadisoa’ey sady eo avao ka zahay hagnampe aze.”—Daniela.
TORO LALA TY BAIBOLY: “O hatea zao mahalin-draha, soa fagnahy.”—1 Korintianina 13:4.
