SBʼAJA NANTALIKI
6. Tojwanel
¿JAS WA STOJOLAN?
Ja bʼa tojwanel tini chʼikan ja sjejel sok ayni ekʼele stojel ja untik ja bʼa smodoʼe mi lekuki. Pe ja it wani stojolan sjejelyile jastik lek ja bʼa sakʼanile bʼa jachuk oj snaʼe lek ja jas oj stsaʼe skʼulajel.
¿JAS YUJ JEL TʼILAN?
Ja bʼa tsaʼanikxta jabʼiljani, kasi mixani ayuk tojwanel bʼa jujuntik pamilyaʼik, pes ja nantataliki wa xiwye bʼa syajbʼesel ja jastal wa xyabʼ aye ja yuntikile. Pe ja lekil nantataliki wa xyaweyi mandarik bʼa mi xjelxi ja yuntikileʼi sok wa sjeʼayile jastal skʼuʼajel.
«Ja untiki wani skʼana oj snaʼe ja janekʼ mero wa xlajxiyujileʼi bʼa jachuk oj kʼotuke kristyanoʼik bʼa ayxa spensare sok bʼa wa skomo sbʼaje. Ta mikʼa, jachni oj kʼot jastal jun barko bʼa mey stimonil: bʼa ojni kʼot ja sjutsʼinil bʼa pilanxa lado oj wajuk sok oj waj jaʼ» (Pamela).
¿JASA OJ BʼOBʼA KʼULUK?
Altanto ajyan. Ta jawa kerem mi skʼuʼan, ayi snaʼ ke ja jastik wan skʼulajeli ojni yil smaloʼil. Pe ta skʼuʼan, kʼulan felicitar.
«Yuja bʼa jtyempotik mixa jel kʼuʼabʼaluke ja untiki, tolabida wa xkʼulan felicitar ja kuntikil yuja wa skʼuʼaneʼi. Jachuk masni pasil wa xyabʼye skʼuʼajel ja tojelal ja yajni ay stʼilanil» (Christine).
RASON BʼA BIBLIA: «Yujni chikan jas stsʼunu jun kristyano jani oj yil sat» (Gálatas 6:7).
Abʼan stojolil. Yajni xa tojo jawa keremi, pensaraʼan sbʼaja sjabʼili, ja janekʼ wa xlajixiyuji sok janekʼto smaloʼil ja jas skʼuluneji. Bʼa tʼusan mi spetsaniluk ekʼele, masni lek wa x-elkʼot ja tojwanel yajni yuj jun jasunuk mi lek skʼulan. Jun sjejel, ta jawa kerem mi skisa ja mandar awaʼunejyi sbʼaja syamjel ja celulari, bʼobʼta masni lek mi oj wa syam jun tyempo. Pe moka nik jun niwan kʼumal sbʼa jun jasunuk mey lek stʼilanil.
«Wani xkila lek ta yuj gana skʼokoki kabʼal ja jkeremi ma miyuk. Mini junukxta ja stojel yuja ayiʼoj jun smodo bʼa mi lekuk sok yuja skoltajel bʼa oj yabʼ stojol mi lekuk ja jas skʼulani» (Wendell).
RASON BʼA BIBLIA: «Tatalik, mok loma wawex kʼe skoraja jawa wuntikilexi, bʼa jachuk ja yeʼnleʼi mi oj el sganaʼe» (Colosenses 3:21).
Yajxta ilwanan. Ta yajxta waxa tojo jawa wuntikili, ojni yil-e sok masni pasil oj yabʼye skisjel ja tojelali sok stojel ja smodoʼe.
«Yajni ja jkeremtikon wa skʼulan jun jasunuk bʼa mi lekuk, wani xkalatikonyabʼ jel gusto ayotikon bʼa spetsanil ja jas lek stsaʼunej skʼulajel masan ja bʼa tyempo jaw. Wani xkalatikonyabʼ ke ja jas mi lek skʼulani mini tolabida oj kan jastal smarka ta stojoʼi sok ja keʼntikoni ojni cha jkoltaytikon» (Daniel).
RASON BʼA BIBLIA: «Ja yajalkʼujoli jelni juntiro ja spasensya sok lek skʼujol» (1 Corintios 13:4).
