Soko rekuti kupangira rinoda kureya kutungamirira kana kuti kufundisa. Nguwa dzimweni, izvona zvinobatanidza kusumurura mwana paanoita musakazwa. Asi kupangira kunonyanya kureya kufundisa mwana nge zve musiyano uripo pakati pe zviro zvakanaka no zvakashata kuti akwanise kuita zvisananguro zvakanaka.

Mazuwa ano, abereki amweni aacapangiri ana awo ngekuti anothya kuti anewo anozokura ecizwa hingana kuti aabetseri. Asi abereki ano ungwaru anopasa mitemo ana awo uye anoafundisa zvaanodikana kuita kuti aiteerere.

“Ana anodikana kupaswa mitemo kuti akure ano tsika dzakanaka. Kana akasama kupangirhwa, anoita hingana bharko rinondundhwa recienda kese kunoenda mhepo uye rinozopedzesera raphidimuka.”—Pamela.

Musacinje zvamunonga mareketa. Kana mwana wenyu akasama kuteerera zvamunonga mamubvunza, mupangirei. Asi paanonga ateererawo, munodikana kumusimba.

“Ana akawanda aacateereri zvinorekethwa no abereki awo. Ndiyo ndaa ndinogara ndecisimba ana angu ngekuteerera kaanoita. Kuasimba kunoita kuti atendere kusumururhwa kana pano ciro caanonga ashaisha.”—Christine.

ZVINOBHUYA BHAIBHERI: “Zvinosimwa no munhu, ndizvo zvaacakorora.”—Agaratiya 6:7.

Pangidzai kuti munozwisisa. Pamunopangira mwana, rangariraiwo nge zve thunga rake, zvaanokwanisa kuita, uye kuti waita cishaishi cakakura kudini. Kuti mwana anyase kubetserhwa no mupango, imwimwi munodikana kumupasa mupango unoenderana no ciro caanonga ashaisha. Ngo muezaniso, kana mwana akashaisha kuseenzesa thurufunu, munodikana kumutorera thurufunuyo ke nguwa doko basi kana kuti kumurambidza kuti asaiseenzese nguwa dzimweni. Kupinda izvona, kana mwana wenyu akashaisha ciro cidoko-doko, musaite kuti nyayeyo igare nyaya yakakura ngekuti yamunyangadzai.

“Kana mwana wangu akashaisha, ndinoedza kuona kuti wazviita ngekuda here kana kuti haiwa. Kusumurura kunosiyana pakuti zviro zvaashaisha zvaacigarire here kana kuti zvandoitikawo.”—Wendell.

ZVINOBHUYA BHAIBHERI: “Musashushe ana enyu kuti asaore mwoyo.”—Akorosi 3:21.

Pangidzai rudo. Ana anokwanisa kutenda mupango paanoona kuti abereki awo aapangira ngekuti anowada.

“Mwana wedu we murumbwana paaishaisha, taimuedzurira kuti tinodada naye nge zviro zvese zvakanaka zvaaita. Taimupanganidzira kuti cishaishi caainga aita cainga cisikareyei kuti iyena i munhu wakashata. Caidikana ngecekuti asaphindezve cishaishi icona uye taimubvunza kuti tiripo kuti timubetsere.”—Daniel.

ZVINOBHUYA BHAIBHERI: “Rudo rino mwoyo unononoka kutsamwa uye rino unaki.”—1 Akorinti 13:4.