Кижизидилге дээрге өөредир азы углап баштаар дээни ол. Чамдыкта уругнуң аажы-чаңын эдер дээш, кезедир апаар. Ынчалза-даа кижизидилгениң кол сорулгазы — уруг чуртталгазынга шын шиитпирлерни боду хүлээп билир кылдыр, эки-бакты ылгап өөредири-дир.

Чамдык ада-иелер ажы-төлүн кижизидер хемчеглерни сөөлгү үеде көңгүс ажыглавастап калган. Олар ажы-төл бодун үнелевейн, чөгенчиг кижи кылдыр санап эгелээр деп бодаарлар. Ынчалза-даа ажы-төлү дээш ёзулуг сагыш човап чоруур ада-иелер бажыңынга чурум тургузарындан кортпас база ажы-төлүн ону сагыыр кылдыр өөредирлер.

«Ажы-төлдүң өзүп сайзыраарынга тода кызыгаарлар черле херек. Чогуур кижизидилге чокка ажы-төл руль чок корабль дег, уг-шиин чидирип, озал-ондакка таваржып болур» (Памела).

Чайгылыш чок болуңар. Бир эвес төлүңер тургузуп каан чурум дүрүмнерин сагывайн турар болза, хемчегден алыңар. А бир эвес ол бодун эки алдынып турар болза, ону албан мактаңар.

«Мен ажы-төлүмнү дыңнангыр чоруу дээш үргүлчү мактаар мен, чүге дизе ындыг ажы-төл дыка ховар болгай. А кажан оларны кезедип туруңарда, мактап чорааныңар кеземчени чиик хүлээп алырынга дузалаар» (Кристин).

БИБЛЕЙЖИ ДҮРҮМ: «Кижи чүнү тарып аарыл, оозун ажаап алыр» (Галатчыларга 6:7).

Угаан-сарыылдыг болуңар. Кижизидер хемчеглер төлдүң назы-харынга болгаш хире-шаанга дүгжүр ужурлуг. Кеземче ооң кылган үүлгедии-биле харылзаалыг боор болза, ынчан ол үре-түңнелдиг болур. Чижээ, ажы-төл телефонну шын эвес ажыглап турар болза, телефон ажыглаар үезин кызыгаарлап, ынчаар оларны кезедип болур. Ынчалза-даа херек чок чүүлдер дээш оларны кажанда-даа кезетпеңер.

«„Төлүм мени өжегерээн дыңнаваан бе азы анаа чазыпкан бе“ деп билип алырын кызар чордум. Эдер ужурлуг багай аажы-чаң биле бичии частырыгның аразында улуг ылгал бар» (Уэндэл).

БИБЛЕЙЖИ ДҮРҮМ: «Ада-ие, ажы-төлүңерни ажындырбаңар, оон башка оларның силерден хөңнү калып каар» (Колосчуларга 3:21).

Ынакшылдыы-биле кижизидиңер. Ада-иезиниң ынакшылын көрүп чоруур ажы-төлге кижизидер хемчеглерни хүлээп алыры белен.

«Кажан оглувус чазыптарга, аңаа кайы хире ынаавысты база эрткен үеде ооң кылып чораан эки чүүлдерин сагындырар чордувус. Бир эвес ол частырыын эдип алыр дээш кызар болза, ооң ат-алдары баксыравас деп тайылбырлаан бис. Оон аңаа дузалажырынга беленивисти бүзүреткен бис» (Дэниел).

БИБЛЕЙЖИ ДҮРҮМ: «Ынакшыл шыдамык-даа, буянныг-даа» (1 Коринфичилерге 13:4).