Li yakʼbel mantal ololetike te smakojbe skʼoplal ti xichʼ beiltasel, chanubtasel xchiʼuk bakʼintike, skʼanik tukʼibtasel kʼalal muʼyuk kʼusi lek tspasike. Pe maʼuk noʼox taje, yuʼun skʼanik chanubtasel yoʼ lekuk stalelalik, vaʼun lek chkʼot ta pasel yuʼun li kʼusi tsnopike xchiʼuk muʼyuk chchʼayik ta be.

Li jabiletik echʼem tale, junantik totil meʼiletike muʼyuk xa chakʼbeik mantal li yalab xnichʼnabike, yuʼun ta xiʼik mi chopol xaʼi sba yuʼunik. Pe li lekil totil meʼiletike ta smelol noʼox chakʼbeik mantal li yalab xnichʼnabike xchiʼuk chakʼbeik yil kʼuxi ta pasel.

«Li alab nichʼnabiletike persa skʼan xichʼik albel li kʼusi stakʼ xchiʼuk li kʼusi mu stakʼ spasik sventa lekuk xtojobik snopel mi chʼiike xchiʼuk ti ta smeloluk noʼox li kʼusi tspasike. Yuʼun ti mi moʼoje, xkoʼolajik ta jkot varko ti muʼyuk stsʼotobile, vaʼun xuʼ xchʼay ta be xchiʼuk ti xmutʼij ta voʼe» (Pamela).

Kʼotuk ta pasel li kʼusi chavale. Mi mu xchʼun mantal li avalab anichʼnabe, albo yaʼi li kʼusi xuʼ snuptan ta skoje. Pe kʼupil kʼoptao mi ta xchʼun mantale.

«Ta skoj ti naka xa jtoyba ololetik oy avie, ta jkʼupil kʼoptaan li kalab kʼalal oy kʼusi lek tspasike. Kʼalal jech ta jpase, mas kʼun chaʼiik xchʼunel kʼalal chkalbeik mantale» (Christine).

BEILTASEL TA VIVLIA: «Kʼusiuk noʼox ti yakal tstsʼun li jun krixchanoe, jaʼ tstsobbe sat xtok» (Galatas 6:7).

Ta spʼisoluk noʼox me. Kʼalal chavalbe mantal li avalab anichʼnabe, tsako ta venta ti jayib sjabilale, ti bu kʼalal xaʼibe smelolale xchiʼuk ti kʼu stsatsal li kʼusi la spase. Jaʼ onoʼox mas chaʼibe smelolal kʼalal chavalbe mantal mi oy kʼusi chopol la spase. Jech kʼuchaʼal liʼe, mi mu xchʼun ti kʼu sjalil stakʼ stunes li selulare, xuʼ van xapojbe kʼuk sjalil. Pe mu me xa˗echʼ ta mas mi muʼyuk mas tsots li kʼusi la spase.

«Baʼyel ta jkʼel mi yolbaj muʼyuk la xchʼun jmantal li jkereme. Kʼalal yalel muʼyuk ta xchʼun mantale, ta jtukʼibtas. Pe mi muʼyuk laj yakʼ venta ti oy kʼusi chopol la spase, ta jkolta sventa xaʼibe smelolal» (Wendell).

BEILTASEL TA VIVLIA: «Mu me xasabeik skʼakʼal yoʼonton anichʼnabik sventa mu xchibaj yoʼontonik» (Kolosenses 3:21).

Oyuk slekil avoʼonton. Mi ta slekil avoʼonton chavalbe mantal li avalab anichʼnabe, chakʼik me venta, mas kʼun chaʼiik xchʼunel li mantale xchiʼuk chakʼik venta ti mu lekuk li kʼusi la spasike.

«Kʼalal oy kʼusi muʼyuk lek chbat ta pasel yuʼun li jkeremkutike, ta jvulesbekutik ta sjol ti mas ximuyubajkutik kʼalal lek kʼusi chkʼot ta nopel yuʼune. Chkalbekutik ti muʼyuk chil svokol mi muʼyuk xa jech chchaʼpase xchiʼuk ti ta jkoltakutik sventa xlekub batele» (Daniel).

BEILTASEL TA VIVLIA: «Li kʼanelale xmalaj yuʼun xchiʼuk lek yoʼonton» (1 Korintios 13:4).