VWỌ KẸ EMIỌVWỌN
6: Ọghwọku
OBORẸ O MUDIAPHIYỌ
Ota na ọghwọku se mudiaphiyọ e vwo yono yẹrẹ kpọ ohwo viẹ. Ọkiọvo, ọnana se churobọ si a vwọ kpọ orharhe uruemu rẹ ọmọ viẹ. Ọke buebun, ọ sa dia e vwo yono emọ iruemu iyoyovwin re cha chọn ayen uko vwo bru omamọ erhiẹn.
OBORESORỌ Ọ VWỌ GHANRE
Vwẹ ikpe evo rhire na, erua evo gbe guọnọ vwẹ ọghwọku kẹ emọ raye-en kidie oshọ muẹ ayen nẹ a da ghwọku ọmọ na, ọ sa nẹrhẹ o ni oma rọyen kueku. Ẹkẹvuọvo emiọvwọn re ghwanre vwẹ irhi kẹ emọ rayen, ji yono emọ na ayen vwọ yọnrọn irhi na.
“Ofori nẹ e jurhi kẹ emọ kpahen obo rẹ ayen se ru vẹ obo rẹ ayen je se ruo rọ sa chọn ayen uko vwọ dia imiragua ri tedje. Ababọ rẹ ọghwọku emọ cha họhọ okọ ro vwo usiokọ ra vwọ kpọ-ọ, ro muẹ djẹ, rọ sa tobọ shu dede.”—Pamela.
OBO WO SE RU
Nenesi rẹ obo wọ tare. Ọmọ wẹn rhe nene urhi wo ji vwọ kẹ-ẹ, gbe jẹ ọ rioja ri jẹ ẹmienyo rọyen. Ẹkẹvuọvo, wo mi jiro ọke ọ da yan nene urhi wo ji kẹ na.
“Kọke kọke yen mi vwo jiri emọ mẹ fikirẹ ẹmienyo rayen vwẹ evunrẹ akpọ nana rẹ ẹmienyo kanre na. Wo de jiri emọ kọ cha nẹrhẹ ọ lọhọ ayen vwo rhiabọreyọ ọkpọvi wọ vwọ kẹ ayen.”—Christine.
UCHEBRO RI BAIBOL: “Okankọn kẹ okankon rẹ ohwo kọnre, ọye o ji che vun rhe.”—Galesha 6:7.
Vwo ẹro abavo. Wọ da ghwọkuẹ ọmọ, roro kpahen edje ọmọ na, obo rẹ ẹgba rọyen se mu vẹ obo rẹ oruchọ rọyen na bra te. Ọghwọku shephiyọ siẹrẹ o de shamu vẹ oruchọ rẹ ọmọ na, kerẹ udje, ọmọ da vwẹ ifonu vwo ruiruo vwẹ idjerhe rọ chọre, e se mie ifonu na vwẹ ọmọke evo. Vwẹ ọke vuọvo na, kẹnoma kẹ uruemu ra vwọ ghwọkuẹ emọ fikirẹ erọnvwọn ri fiemu-u.
“Me davwengba vwọ riẹn se ọmọ mẹ na vwẹ arogba rọyen vwọ churhi mẹ yẹrẹ ọ chọrọ obọ. Ofẹnẹ herọ vwẹ uvwre rẹ oruchọ rẹ ọmọ vwariẹn ru ro fori nẹ a vwọphia vẹ orharhe uruemu rẹ ọmọ vwori ro fori nẹ a kpọvi.”—Wendell.
UCHEBRO RI BAIBOL: “We ru emọ rẹ ovwan emu ọdada-a, ophu de rhe mu [ayen].”—Kọlose 3:21.
Dje ẹguọnọ phia. Ọ lọhọ kẹ emọ ayen vwo rhiabọreyọ ọghwọku siẹrẹ ayen da riẹn nẹ ẹguọnọ yin mu ese vẹ ini rayen vwọ ghwọku ayen.
“Siẹrẹ ọmọshare avwanre de ru chọ, kẹ avwanre vwẹ imuẹro kẹ nẹ oma vwerhẹn avwanre kpahen emamọ erhiẹn ro bruru vwẹ obuko re. Avwanre vuẹ nẹ oruchọ rọyen na cha nẹrhẹ avwanre vwẹ ẹro ọchọchọ vwo no-o, siẹrẹ ọ da davwẹngba vwo nene ọkpọvi ra vwọ kẹ, avwanre je kẹ imuẹro nẹ avwanre cha chọn uko vwo ru ewene ro fori.”—Daniel.
UCHEBRO RI BAIBOL: “Ẹguọnọ vwo odiri kugbe aruẹdọ.”—1 Kọrẹnt 13:4.
