Dissiplinar dele volte vol dir orientar o insegnar. Altre volte vol dir coreger un picinin che el se comporta mal. Ma tante volte dissiplinar l’è insegnar al to fiol la diferensa che ghen’è intrà quel che l’è giusto e quel che l’è sbalià. Cossita, lu el va imparar a far bone dessision e no’l gavarà bisogno de coression.

Nei ùltimi ani, arquanti genitori no i dissiplina i so fioi. Lori i ga paura che far questo fae i picinini gaver manco amor pròpio. Ma i genitori sàbi i mete dele règole chilibrade e i trena i so fioi par obedir a queste règole.

“I fioi i ga bisogno de limiti par deventar persone chilibrade quando che i vegnarà grandi. Sensa dissiplina lori i ze come un barco sensa leme che col tempo el pol perder la diression o fin ndar do.” — Pamela.

Fà de acordo con quel che te disi. Se el to fiol no’l obedisse ale to règole, te ghè de darghe coression, ma anca te ghè de lodarlo quando lu l’è obediente.

“Mi sempre lodo i me fioi, parché lori i ze obedienti anca se no l’è mia fàcile in questo mondo. Se noantri ghemo el costume de lodar i picinini, lori i catarà pi fàcile acetar la nostra coression quando ghe ocore.” — Christine.

COSSA LA BÌBLIA LA DISE: “El omo el tol su quel che el semena.” — Gàlati 6:7.

Sìpia chilibrà. Pénseghe sora: Quanti ani galo to fiol? Cossa che lu el capisse de quel che el ga fato? Saver questo te giutarà a capir quala che la ze la dissiplina pi giusta par el so sbàlio. Par esémpio, fursi el to fiol no’l ga obedio ale to règole sora come doperar el selular. In questa situassion te pol dessider che lu el vae doperar manco el selular o el vae restar sensa par un tempo. Anca, se el to fiol no’l ga fato qualcossa tanto grave, no stà far de pi de quel che l’è.

“Mi proo capir se el me fiol el ga desobedio aposta o se lu sol el ga fato una dessision sensa pensar. Parché ghen’è difarensa intrà un difeto de personalità, che ghe ocore presto de far una coression, e un sbàlio sèmplisse, che el ga sol bisogno de esser mostrà.” — Wendell.

COSSA LA BÌBLIA LA DISE: “Genitori, no sté iritar i vostri fioi par che i reste desanimadi.” — Colossensi 3:21.

Mostrar amor. I fioi i cata tanto pi fàcile acetar una coression quando lori i sà che i genitori i ghe dà dissiplina con amor.

“Quando el nostro fiol el fea un sbàlio, noantri sempre ghe ricordéino che gavéino orgòlio dele so bone dessision che lu el gavea belche fato. Noantri ghe spieghéino che, se lu el fea qualcossa par coreger el so sbàlio, la so reputassion no la saria rovinada. El nostro ogetivo l’era che el fusse sicuro che noantri sarìssino sempre lì dela so banda par giutarlo.” — Daniel.

COSSA LA BÌBLIA LA DISE: “El amor l’è passiente e bon.” — 1 Corinti 13:4.