DANJEP MANJEP ENAM WAL
6: Kangip Ka
NALNE PILDOM
Kangip ka panimen e ngalnem kindnem ka ngo duwom erngondol. Ala kunum pende ne alla enda kunum yune erkun endel eri. Ba kunum puli ngalnem mambnem dulto enda mal duwom erngoi, kunum kunum bunuman ka bol wal enda.
NAL ENDE WAL KERMA PAIM
Kongar pende wopunom, ngal danjep manjep ngaljep kangip ka nangom, enjep kangip ka embe ngonamen e erkelde ngaljen man kanapisam nepisim. Ba danjep manjep bunuman kapaim ga, lo ka pakle karkar enam mal kangip ka ngom.
“Ngal nengoi enam wal na naenam wal kanpolto, yau mine wonam kunum mambnem e karkar enam. Ngaljen man kangip ka nangonjin dal, sip ende punda wusngam kanpol naro punom mal—ngalnem wusngam kes karkar enambe ombun mine wonda.”—Pamela.
ENDEL WAL
Kunum kunum endel. Nim lo pakli ngalnem karkar naerim dal, ambanto yune erka endel. Ba olom lo paksen karkar erem dal, kunum kunum kapane ngondol.
“Yipe ya mala alamb yu karkar naesim kunum, ngalna man yu karkar esim, na kunum kunum kapane ngongo erind. Kapane gnomon mambnem e erkelde enjep alla ende esim kunum yune erkun enamen onom paim.”—Kristen.
BAIBEL KOLTA YU: “Alamb ende tarem wal, e mongse wakil sinda.”—Galesia 6:7.
Mambnem dulto karkar endel. Yu ende ne ngal erkun enalne erindal ngal kongar nalmal meim, sape nalmal paim, ala ombun nalmal mine wom kanpolto endel. Ngal alla enda kunum erkun enamen panda mal enjin dal, olom pakeronda. Ende embe, pon konganem ka naerim dal, dam mam tal pon siyem ninamble kunum pende pon konganem naenda. Ala wal kere ende enda bar si wal kerma mal pakle yu puli naninambel.
“Na ngalna alla ende enem kunum, olom kanse enem mo kanpol naro enem kanal ne ere erind. Ngal ende kansealla anjngo ermeim e jelmal pa, kanpol naroalla ende erde erkun esmen e ngonom.”—Wendel.
BAIBEL KOLTA YU: “Enem ngaljep man popol sinam wal naenam, embe enjip dal enjep kumbol kes mora.”—Kolosi 3:21.
Kanka mem enam. Ngal pilkane enambe danjep manjep kanka mem bol enjep erkun enjip dal, pilsi karkar enam onom panda.
“Kil ngagjel alla ende enem kunum, kil olom wal ka pende yero erim mal kapisbel pane ngongo enjil. Kil olom nengo nim alla endel kunum pilsindel yu nengonam karkar erind dal, nim kangem ka tokes namoksol paninjil.”—Daniel.
BAIBEL KOLTA YU: “Kanka mem seim ye wimuk kamkam nane, mambnem ka enem.”—1 Korin 13:4.
