Táakaʼan u nuʼuktaʼaloʼob yéetel u yaʼalaʼaltiʼob ka u yutskíintoʼob le baʼax maʼ maʼalob ku beetkoʼoboʼ. Táakaʼan xan u kaʼansaʼaltiʼob u beetoʼob yéetel u chʼaʼtuklikoʼob baʼax maʼalob utiaʼal u bin utsil tiʼob.

Teʼ tu tsʼook añosaʼ le taatatsiloʼoboʼ óoliʼ maʼ tu tsolnuʼuktik u paalaloʼob tumen saajkoʼob u beetkoʼob u yaatal u yóoloʼob. Chéen baʼaleʼ le taatatsiloʼob u yaabiltmaj u paalaloʼoboʼ ku kaʼanskoʼobtiʼob u yuʼuboʼob tʼaan yéetel u beetoʼob baʼaloʼob u yojloʼob jeʼel u páajtal u beetkoʼobeʼ.

«Kʼaʼabéet u kaʼansaʼal tiʼ le paalaloʼob baʼax unaj u beetkoʼoboʼ, beyoʼ kéen nojochchajkoʼobeʼ maʼ kun tuukuloʼob bey mejen paalaloʼobeʼ. Wa maʼ tu kaʼansaʼaloʼobeʼ yaan u yúuchultiʼob jeʼex junpʼéel barco minaʼan u guíaileʼ, chéen bey kun suʼusutbil hasta kéen saʼatakoʼ» (Pamela).

Beet jeʼex a waʼalikoʼ. Wa a paal maʼ tu yuʼubik tʼaaneʼ aʼaltiʼ jeʼel u bin kʼaasil tiʼeʼ. Chéen baʼaleʼ wa ku yuʼubik a tʼaaneʼ felicitarte.

«Bejlaʼeʼ óoliʼ mix máak ku yuʼubik tʼaan, le beetik kin felicitartik in paalal kéen u yuʼuboʼob tʼaan. Beyoʼ kéen kʼaʼabéetchajak in tsolnuʼuktikoʼobeʼ yaan u kʼamkoʼob» (Christine).

LE BIBLIAOʼ KU YAʼALIK: «Jeʼel baʼaxak ka u pakʼ máakeʼ le xan ken u joche» (Gálatas 6:7).

Chʼaʼ en cuenta jejeláas baʼaloʼob. Le kéen a tsol u nuʼuk tiʼ a hijoeʼ chʼaʼ en cuenta u edad bey xan wa jach kʼaas le baʼax tu beetoʼ. Wa ku kʼaʼabéettal a castigartik a hijoeʼ maas maʼalob wa le castigo ken a tsʼáatiʼoʼ yaan baʼax u yil yéetel le baʼax maʼ maʼalob tu beetoʼ. Por ejemplo wa maʼ tu respetartaj le tiempo ta waʼalajtiʼ ken u máans yéetel u celularoʼ, jeʼel u páajtal a waʼaliktiʼ maʼ ken u usart le celular ichil junpʼéel tiempooʼ. Chéen baʼaleʼ ilawil xan maʼ u jach píitmáan a kʼab.

«Mantatsʼ kin tratartik in wilik wa in hijoeʼ u yóoliliʼ u beet baʼax kʼaaseʼ wa chéen bintiʼ. Maʼ igual bix jeʼel u tsoʼolol u nuʼuk tiʼ juntúul paal u yóoliliʼ u beet baʼax kʼaaseʼ yéetel tiʼ juntúul maʼ u yóoliliʼ u beetiʼ» (Wendell).

LE BIBLIAOʼ KU YAʼALIK: «Taatatsileʼex, maʼ a beetkeʼex u kʼuuxil a paalaleʼex utiaʼal maʼ u yaatal u yóol u puksiʼikʼaloʼob» (Colosenses 3:21).

Eʼes yaabilaj. Wa ka kaʼansik a paalal yéetel yaabilajeʼ maas chéen chʼaʼabil ken u kʼamoʼob le kaʼansaj ken a tsʼáatiʼoboʼ. Beyoʼ yaan u kankoʼob baʼax maʼ unaj u beetkoʼobiʼ.

«Le kéen u beet k-hijo junpʼéel baʼal maʼ maʼalobeʼ, k-kʼaʼajsiktiʼ le baʼaloʼob maʼalobtak u beetmoʼ yéetel k-felicitartik. K-aʼalik xan tiʼeʼ kʼaʼabéet u yilik u yutskíintik le baʼax tu beetoʼ utiaʼal maʼ u jach sufrir, tsʼoʼoleʼ k-aʼaliktiʼ xaneʼ yaan k-áantik» (Daniel).

LE BIBLIAOʼ KU YAʼALIK: «Máax yaan u yaabilajeʼ yaan u paciencia yéetel ku yeʼesik u yutsil» (1 Corintios 13:4).