OŃOLA BAYEDI
7: Bede̱mo
NJE NIKA E MAPULANO̱ KWALA
Bede̱mo be nde mbadi o po̱sino̱ o die̱le̱ longe̱ lo̱ngo̱. K’eyembilan, o mawe̱ o be̱ mbale̱ o mambo me̱se̱ e? Yete̱na e, ke̱ ye̱ke̱i te̱ o me̱nde̱ pula jokwe̱le̱ bana bo̱ngo̱ be bedangwedi ba bwam.
Bede̱mo be bambe̱ pe̱ bedangwedi ba bwam. Moto nu be̱n bedangwedi ba bwam e ngiń’ebolo, a to̱ndi te̱me̱ la sim, a mombwea pe̱ bape̱pe̱—mambo mena moto a mokwano̱ bwam ke̱ a dia mūtu.
BETE̱SEDI BA BIBE̱L: “Lee̱ mūtu ngea angame̱nno̱ tongwea, nde a si me̱nde̱ samba mo̱ nate̱na o bodun bao.”—Minia 22:6.
OŃOLA NJE NIKA ŃENO̱ MWEŃA
Bedangwedi ba bwam be mweńa o nin ponda belongisan be lańno̱. Ńango a muna mō̱ nu be̱n dina ná Karyn mo̱ ná: “Mindenge ma bobe me ná mi so̱be̱ ponda ye̱se̱ o belongisan ka telefon, o̱rdinate̱r to̱ tafe̱l. Bana basu be ná ba ja biso̱ be̱be̱, nde bombwa mambo ma titi ko̱nji!”
BETE̱SEDI BA BIBE̱L: “Bato ba koki . . . bangwe̱le̱ dibie̱ labu o jemba bwam na bobe.”—Bonahebe̱r 5:14.
Bede̱mo ba bwam pe̱ be mweńa. Nik’e bambe̱ pe̱ bia kwala ná (“son” na “na som”) na bia jombwea bape̱pe̱, lambo le pasa we̱nge̱, ońolana belongisan ka telefon nde be bō̱ mweńa buka bato.
BETE̱SEDI BA BIBE̱L: “Nje lo mapulano̱ ná bato ba boleye bińo̱, bińo̱ pe̱ bolea babo̱ nikame̱ne̱.”—Lukas 6:31.
NJE WENO̱ NÁ O BOLA
Langwea mo̱ ne̱ni dangwa. K’eyembilan, bamuwaso ba so̱i ná bekoke̱le̱ be meka babo̱me̱ne̱ o be̱ne̱ mulatako ma mome na muto ke̱ ba si bai to̱ babe̱ yete̱na bokwe̱le̱ babo̱ ná nika ńe bobe.
MALEA: Bolane̱ mambo ma matombe̱ buńa te̱ o botea ekwali e mombweye̱ bede̱mo. K’eyembilan, yete̱na mibia mi makwalea ońola ebwan a njo ninde̱ne̱, we ná o kwala ná: “Ni mbadi bato ba malee̱le̱no̱ bape̱pe̱ bosinga ńe ńakaka. O mo̱nge̱le̱ ná nje e tute̱le̱ bato o be̱ nika e?”
“Ye bana ndutu jita o po̱so̱ nje ye bwam to̱ bobe ke̱ ba si bi nje ye bwam to̱ bobe.”—Brandon.
Okwe̱le̱ mo̱ bede̱mo ba bwam. Nate̱na mo̱me̱ne̱ muna nusadi pe̱ e ná okwa kwala ná “son” na “na som,” na jombwea pe̱ bape̱pe̱. Kalat’a Inglisi ni be̱n dina ná Parenting Without Borders e kwali ná: “Etum te̱ bana ba me̱ne̱no̱ ná be nde dongo diwo̱ la dibo̱to̱ la bato dinde̱ne̱ ka mbia, esukulu na mundi, ba le̱le̱m o bola bebolo ba muyao be mawaneye̱ babo̱ na bape̱pe̱ tombwane̱.”
MALEA: Bola bana bo̱ngo̱ bebolo ba mboa o jongwane̱ babo̱ ná bokwe mweńa ma bolea bape̱pe̱.
“Bana basu ba ko̱lo̱ngo̱ne̱ te̱ bola bebolo ba mboa tatan, ba si me̱nde̱ taka ke̱ ba nija na babo̱me̱ne̱, ońolana bola la nika di si me̱nde̱ pe̱ be̱ babo̱ mwe̱n.”—Tara.
