PI JUNYODO
8: Lapor
THELEMBENE TIE ANG’O?
Junyodo ma gitie lapor gikwo nimakere ku gin ma gibeponjo. Calu ve: Ecopo bedo lembe ma tek iri niponjo nyathin peri nia ebed eyer lemandha ka in bende ibed iyero ire nia, “yer nia ambe i pacu,” tek ng’atu moko m’ibemito ngo iwec i bang’e ubedwong’o dhugola.
“Dhanu ma pol giyero kumae: ‘Tim lembe m’ayero, ento ungo m’abetimo.’ Ento lembuno kud awiya lundo erombo ngo. Gitiye calu unvodu ma cwiyo lembe ceke ma wabeyero man ma wabetimo, man gibinyutho iwa ka gin ma watimo urombo ngo ku gin ma wabeii niponjo igi nia gitim.”—David.
CIK MIR UKUNGU MI BIBLIA: “In m’iberweyo nia, “Kud jukwal,” ilund ibekwalu?”—Jurumi 2:21.
PIRANG’O PIRE TIE TEK NIA JUNYODO GIBED LAPOR MA BER
Gin ma junyodo timo bedo kud adwogi lee iwi awiya migi ma thindho man m’aradu bende nisagu gin ma ng’atu mange timo, uketho i iye kadok jurimbgi de. Eno nyutho nia in re m’itie ng’atu ma kwong’a ma romo telo wi awiya peri kara giwoth i yo m’atira, ma nwang’u ibenyutho ko andha nia ibetiyo ku lembe m’iberweyo.
“Wacopo yero lembe moko wang’ dak man waparu nia nyathin mwa ubewinjo, re ceng’ ma wabitimo lembe moko acel m’ukoc ku gin ma wayero, nyathin bigwoko tap maecane. Awiya giketho wigi kilili i kum lembe ma wabetimo kadok nwang’u wabeparu nia gibedieng’ ungo ku lembene de.”—Nicole.
CIK MIR UKUNGU MI BIBLIA: ‘Rieko m’uai malu. . . umbe kud umbili.’—Yakobo 3:17.
ICOPO TIMO ANG’O?
Ng’ii cuu i kura peri giri. Kit galuwang’ ma kani ma ibed ineno? Ibed i tiyo ku jadhogi mi gamiri man awiya peri nenedi? Itie ku kit jurimo ma nenedi? Nyo ibed idieng’ ku jumange de? I adundo, nyo itie kit dhanu m’ibemito nia awiya peri gibedi?
“Waku won ot para wabed wamito ngo awiya mwa gibed ku kura ma wan de wambe ko.”—Christine.
Kwai kisa pi kosa peri. Awiya peri gidaru ng’eyo nia in de lembe vuth iri. Kan ibed iyero ni jadhogi mi gamiri man ni awiya peri nia “tim ira kisa” i saa m’ukwayere, eno biketho gibinwang’u ponji iwi lembe m’uneno bedo dhanu m’atira man ma jwigere.
“Awiya mwa gimito giwinj nia wabeyiyo kosa m’utimere iwa, man gimito bende giwinj nia wabekwayu kisa pikosa ma watimo. Tekene wabetimo ngo kumeno, gin ma gibiponjo bibedo kende kende nibeumo wi kosa migi.”—Robin.
“Wajunyodo gin ma watimo utie kud adwogi ma lee iwi awiya mwa, man lapor mwa utiye jamtic m’usagu zoo ma watiye ko, pilembe ginene saa ceke. Etie buku ma iye bedo ayaba saa ceke man ma lembe m’i iye jubeponjo saa moko ci.”—Wendell.
