HOUN AGÜBÜRIGU
8. Lichugún lubuidun hénpulu
KA MINI LUBÉI?
Agübürigu ha íchugubaña aban lubuidun hénpulu, winwan hamuti le harufudahabei. Siñati hagurabahan agübürigu lariñagubei lan hasaani inarüni súnwandan anhein dan le lubéi mabusenrun hamá háfuridun eresibiraña gürigia ha achülürübaña áluahaña hábiñe, ariñaga hamá lun hasaani lun lariñagun houn gürigia ua hamá múnada.
“Gíbetiña gürigia ariñagutiña: ‘Adügabéi le nariñagubei, mama le nadügübei’, mahuudunti lariñawagún lira houn isaanigu. Ítara haña irahüñü kei mudusi, rédeiti sun le wadügübei luma le wariñagubei hachügüwagu. Ánhawa arufudaha aban katei houn ani aba wadügün amu, híchuguba fe ani hariñagubei woun” (David).
ADUNDEHANI TÍDANGIÑETI BÍBÜLIA: “Anhein apurichiha bubéi luagu lunti lan míweruhoun lan, kagia uagu bíweruha?” (Rómana 2:21).
KA UAGU LUNTI LUBÉI HADÜGÜNI?
Áyeihatima hamuti isaanigu hani hagübürigu hénpulu sügǘ lau hani furumiñeguarügü amu gürigia hénpulu, hapanaagu leskuelarugu haganagua. Mini lan lira, huguyatima lan keisi agübürigu gayaraabei hadundehaniña hisaanigu luéigiñe üma le buídubei, wínwanrügü humaali ligía le harufudahabei.
“Gayaraati wariñagun aban katei houn wasaanigu san wéiyaasu sin wachoururuni anhein haganbuñadiwa lubéi, lau sun lira, óurame múaran lan le wadügübei luma le wariñagubei, hariñaguni woun. Ténitiña lun sun le wadügübei íbini genege lan mítaran lan” (Nicole).
ADUNDEHANI TÍDANGIÑETI BÍBÜLIA: “Ánhaña ha gámabalin lichú aau le lúmagiñebei Bungiu, […] furangutiña” (Santiagu 3:17).
KA GAYARAABEI HADÜGÜNI?
Álügüdagua humá hungua: “Ida liña san nóuserunu nani weiriou hama nisaanigu? Ka burí programa naríagubei? Ka hawuyeri umadagu nanúadirubaña? Saminatina san hawagun amu?”. Lidan murusun dimurei, hínsiñeti hamuga san hun lun ítara hamá hisaanigu kei huguya?
“Ni nuguya ni nani weiriei, mamuriahantiwa hama wasaanigu lun hafalarun aban lúrudu le mafalarun wamuti” (Christine).
Amuriaha humá ferudun. Subudi hamaali isaanigu chará hamá hagübürigu. Ligíati, anhaün amuriaha ferudun tuma hani weiriou luma hama hisaanigu dan le hachararun houn, harufudahañame houn gebegi lan louserúniwa lau arumani luma lau ǘnabuguni.
“Mosu wánharun lun wachara, amuriaha wagíame ferudun lugundun anhein madügün wamá, mafurendeirunbaña wasaanigu adügei ligiaméme” (Robin).
“Gayaraati weiri lan lubafu le wadügübei keisi agübürigu lidan le hanúadirubei wasaanigu. Wéiriti lebegi hénpulu le wíchugubei houn ladüga ligíatima unbei hetenira. Ítara liña wani hénpulu kei aban líburu to daraguboun súnwandan, to arufudahaboun houn wéyuagu áriebu” (Wendell).
