Zohchunh awk ṭhami nulepa hna cu an fale an cawnpiak hna ningin an nung. Tahchunhnak ah, chawnh na duh lomi pakhatkhat nih aan leng hei ti u sih. Mah tikah na fa kha “inn ah a um lo tiah va ti” ti bantukin na chimter ahcun biatak chim awkah na cawnpiak kho lai lo.

“‘Ka chim ningin tuah, ka tuah bantukin tuah hlah’ tiah an ti tawn. Asinain mah cu fale caah san a tlai lo. Annih cu ti a dawp khomi thil bantuk an si. Kan chimmi le kan tuahmi paohpaoh kha an i zohchunh, kan cawnpiakmi hna ningin kan nun lo ahcun kan chimmi kha an ngai duh lai lo.”—David.

BAIBAL PHUNGLAM: “‘Fir hlah u,’ tiah phung a chimtu hna, zeicahdah nan fir kun?”—Rom 2:21.

Ngakchia le kumhra fai mi hna cungah nulepa cu ṭhirual pawl le midang nakin huham an ngei deuh. Cucaah nulepa nih an chimmi ningin an tuah ahcun fale kha lam dik zulh awkah a hruai khotu an si lai.

“Kan fale kha atu le atu kan cawnpiak hna caah a ngaih tal an ngai hnga maw tiah kan ruah khawh. Asinain voikhat te kan chimmi ningin kan tuah lo tikah mah kha kan fale nih an hngalh. Kan tuahmi an hngal lo tiah kan ruah tik hmanhah kan tuahmi thil kip kha ṭha tein an zoh.”—Nicole.

BAIBAL PHUNGLAM: “Cunglei in a rami fimnak cu . . . a zer zong a zer lo.”—Jeim 3:17.

Na zulhmi phunglam kha dothlat. Zei bantuk nuamhsaihnak dah na zoh? Na innchunghawi le na fale zeitindah na pehtlaih hna? Ahote dah na komh hna? Midang cungah zawnruahnak na ngei maw? Na fale siter na duhmi hna phun in na um maw?

“Kan nuva in kan zulh khawh lomi phunglam kha zulh awkah kan fale kan hnek hna lo.”—Christine.

Na palh tikah ngaihthiam hal hna. Na fale nih mitlinglo na si ti kha an hngalh. Palhnak na tuah tikah na innchunghawi le na fale sinah “ka ngaithiam” timi bia na chim ahcun dinfelnak le toidornak ngeih awkah na cawnpiak khawh hna lai.

“Kan fale nih palhnak kan tuah tikah kan phuanmi le ngaihthiamnak kan halmi hna kha an theih a hau. Cutin kan tuah lo ahcun palhnak thuh awkah kan cawnpiakmi hna bantuk a si lai.”—Robin.