Na ye kɔc ke dhiëth mïth luui käpiɛth, ke mïthken aa lëu bïk ya luui käpiɛth aya. Ka yen, yïn cï lëu ba mɛnhdu ya ŋɔ̈ɔ̈th bï ya jam ë yith të ye yïn jam lueth ë kööl thok ëbën. Cït man, yïn cïï lëu ba lueth lɛ̈k mɛnhdu bï la lɛ̈k raan tɔ̈u bap thok “nɔn liu yïn baai” ku yïn tɔ̈u baai.

Acïï Debid lueel, “aye kɔc kɔ̈k dac lueel ‘loi të cït të ya luɛ̈l en ku acie të ya luɔ̈i yen.’ Wɛ̈t kënë acïï lëu bï mïth kuɔny bïk ya jam yith. Mïth acït yïthpuɔny awu gutun dhie ë pïu jooc, keek aa lëu bïk këriëëc ëbën cuk lueel piŋ ku alëukë bïk guɔ ŋic nɔn këc ɣok kä cuk ke lueel tääu ë luɔi yic.”

WËËT Ë BAIBOL: “Yïn ee kɔc yɔ̈ɔ̈k [piɔ̈ɔ̈c] an, “Duökï ë kual, ku yïn guöp, ye kual?”—Romai 2:21.

Mïth ku riënythii alëu bïk käjuëc piɔ̈ɔ̈c tënë kɔc ke dhiëth keek, ka wär käjuëc lëu bïk ke piɔ̈ɔ̈c tënë kɔc kɔ̈k awu mäthken. Kënë aye nyuɔɔth, kɔc ke dhiëth mïth aa keek kɔc tueŋ lëu bïk mïthken piɔ̈ɔ̈c ë kueer ë yic lëu bïk ya buɔɔthic, të ye keek kä yekë ke piɔ̈ɔ̈c tääu ë luɔi yic.

Acïï Nikole lueel, “ɣok aa lëu buk këdäŋ lueel dhaman gäkic ku ɣok aa diɛɛr nɔn ye meth ye piŋ, ku na yeku këdäŋ lueel ku cuk ku ë tääu ë luɔi yic, ka lëu bïï meth guɔ ŋic. Mïth aa këriëëc ëbën yeku looi tïŋ cɔk aa nɔn ye ɣok ye takic, keek acï daai ɣok.”

WËËT Ë BAIBOL: “Ku ŋïny käŋ bɔ̈ nhial . . . ku aala cök.”—Jakop 3:17. LƐ̈K YAM

Ye lööŋkun mɛc yïn ke rot ë pïïric ŋiɛc caathiic. Ye käk ë gɛ̈ɛ̈t ë nyin yïndï ye ke ɣoi? Ye raandun cïï week röt thiaak ku mïthku ciëëŋ këdï? Ye kɔc yïndï määth ke yïn? Nadɛ̈ ye diɛɛr kɔc kɔ̈k? Nadɛ̈ ye kä ye ke looi nyuɔɔth nɔn ye yïn raan piɛɛth wën lëu bïï mïthku ya kiëët?

Acïï Kritiin lueel, “Ɣɛn ku Muɔnydiɛ̈ ɣok aa cie mïthkuɔ ë mac thïn bïk kë wën cukku ë looi ya looi.”

Ye awɛ̈ɛ̈c ca keek looi gam. Aŋic mïthku nɔn ye yïn raan dakic awu raan luui awäc. Të ye yïn ye lueel “malec” tënë raandun cïï week röt thiaak ku mïthku, kënë alëu bï keek piɔ̈ɔ̈c bïk ya jam ke ye röt kuɔɔr piny.

Acïï Robin lueel, “akɔɔr mïthkuɔ bïk ɣok ya piŋ ke ɣo gam kërɛɛc cuk looi, ku awïc kë aya bïk ya piŋ kë yeku lueel malec të cïï ɣok awäc looi. Ku na cuk looi këya, ka cïk lëu bïk awɛ̈ɛ̈cken ya gam.”