Bayedi ba mabole̱ eyembilan ba mabupe̱ nje ba mokwe̱le̱no̱. K’eyembilan, o s’engane̱ mun’ango̱ ná a be̱ mbale̱ yete̱na o yo̱ki langwea mo̱ ná, “Langwea mo̱ ná na titi o mboa,” ke̱ o titi o pula kwalisane̱ moto ńe wa oboso ba jo̱mbe̱.

“Bato ba ko̱lo̱ngo̱ne̱ o kwala ná ‘Bola nje na makwalano̱, seto̱ nje na mabolano̱.’ Nde ni mbad’a bola e si madangwa na bana. Be nde ka mulema ma bre̱ti mu mańo̱ nje ye̱se̱ di makwalano̱ to̱ bola, be pe̱ ná ba langwea biso̱ ná eyembilan jeno̱ o lee̱le̱ e titi mulatako na nje di makekano̱ jokwe̱le̱ babo̱.”​—David.

BETE̱SEDI BA BIBE̱L: “Wa o malangwa ‘ná ba s’iba,’ nde wiba e?”​—Roma 2:21.

Bana na bekoke̱le̱ ba le̱le̱m o jembilane̱ bayedi babu buka to̱ nja nde, to̱ mo̱me̱ne̱ mako̱m mabu. Nika e mapula kwala ná wa nde we mot’a boso o die̱le̱ bana bo̱ngo̱ o ngea ni te̱nge̱n, yete̱na o we̱le̱ o ebolo nje o mokwe̱le̱no̱ babo̱.

“Je ná di langwea mun’asu mulemlem ma lambo ngedi jita esibe̱ mo̱ sengane̱, nde dibokime̱ne̱ di mabolano̱ diwengisan muna a malangwea biso̱ nika. Bana ba mombwa na pe̱ńe̱pe̱ńe̱ nje ye̱se̱ di mabolano̱, to̱ ponda di mo̱nge̱le̱no̱ ná ba titi o je̱ne̱.”​—Nikole.

BETE̱SEDI BA BIBE̱L: “Dibie̱ lena di mawe̱ o mo̱ń le . . . ka ni titi mawo̱ndo̱n.”​—Yakobo 3:17.

Ombwea bedangwedi ba wame̱ne̱. Njika pat’a longe̱le̱ la ńolo o mombwano̱ e? Ne̱ni o mabongwano̱ bana bo̱ngo̱ na nu o baino̱ e? Njika pat’a mako̱m o be̱nno̱ e? Mo̱ o mombwea bape̱pe̱ e? Mo̱ we nde ni pat’a moto o mapulano̱ ná bana bo̱ngo̱ ba be̱ e?

“Biso̱ na mom’am di si mabola bana basu bediedi bena biso̱me̱ne̱ di si mabupe̱no̱.”​—Kristine.

Baise̱ milakisan ke̱ o wusi. Bana bo̱ngo̱ ba bi ná o titi ke̱nge̱nge̱. Kwalane̱ bana bo̱ngo̱ to̱ nu o baino̱ ná, “Lakise̱ mba” ke̱ e mapula nika. Bola la nika di mokwe̱le̱ babo̱ be̱ la mbale̱ na sibise̱ la ńolo.

“Bana basu ba mengane̱ biso̱ ná jembe diwuse̱ lasu na baise̱ pe̱ babo̱ milakisan ke̱ di wusane̱ babo̱. Di si boli te̱ nika, ke̱ je nde o jokwe̱le̱ babo̱ o kudumane̱ mawuse̱ mabu.”​—Robin.