Eltere woo een kuut payxpiil sin, mache was se in lërne. Tsum payxpiil, wën eltere xike iire khiner saan tsu yemant woo aan iire tier xteet: “Saa ich weyer net tehëm.” Tan khan ma net waarte tas tas khint aach imer ti woerheet xprecht.

“Oft heert ma saan: “Mach was is saan awer mach net was ich mache.” Awer tas pariirt net mit ti khiner. Tii kuke sich ales ap was mer saan un mache. Wën mer tëne etwas in lërne un meyer selepst mache tas net, tan tuun se uns tas klaych pekhant mache.”—David

WAS SAAT TI PIIPEL: “Tuu woo preetichst: ‘Xteel net, xteelst? ”—Romanos 2:21.

Khee eene khan ti khiner un soo kaar ti yunge in reete wii ti eltere. Tes weeche sayt teyer, eltere, ti peste persoone fer ayre khiner in lërne mache was richtich is. Awer sicher, teyer selepst mist aach mache was teyer in lërnt.

“Ma khan tausent mool tas selwiche saan tsu ti khiner un ma wees net op se horiche. Awer wën mer een eenslich mool net mache was mer in lërne, pringe se tas uns klaych foer. Ti khiner kepe acht tsu ales was mer mache, soo kaar wën mer tenke tii teete khee acht kepe.”—Nicole

WAS SAAT TI PIIPEL: “Awer ti kluucheet fon oowe is . . . net falx.”—Tiago 3:17.

Tenkt aan was fer moraalixe muste tayn leepe lënke. Was fer sorte filme un prokrame kuks tuu kërn? Wii pehantelst tuu tayn familye? Was fer sorte froynte host tuu? Khimerst tuu tich mit ti anere? In khortse wërte khanst tuu tich frooe: meecht ich soo een sort persoon sin wii mayn khint sol sin?

“Mayne man un ich ferlange fer unser khiner niks was meyer selepst net mache tuun.”—Christine

Sich entxultiche. Ti khiner wise tas iire eltere net perfëkt sin. Wëns tuu tich entxultichst mit tayn familye wëns neetich is—tan kepst tuu een kuut payxpiil fon teemuutichkheet un eerlichkheet.

“Tas is kuut wën unser khiner uns heere saan tas mer ferkheert sin un uns entxultiche. Wën meyer tas net mache, tan tuun tii aan fange iire aychne feele ferxtekle.”—Robin