Max patal jawa’ a exóbchal a tsakámil tatá’ jayej a t’ajál, tam k’wajat a pidhál jun i alwa’ t’iplab. An tataláb axi in ulal i janamtaláb yab in éjtowal kin exóbchij in tsakámil abal ets’ey kwa’al kin uluw an chubaxtaláb.

«Yan i tataláb in uchál in tsakámil: Yab ka nits’biy jawa’ naná’ u t’ajál, expidh ka t’aja’ jawa’ tu uchál. An tsákamchik yab ne’ets kin t’aja’ antsaná’. Jajá’chik in t’ajál ti kwéntaj patal jawa i ulal ani i t’ajál. Max ki exóbchij jant’oj ani pil jawa’ i t’ajál, jajá’chik in t’ajál ti kwéntaj ani ne’ets tu ku ucha’» (David).

JAWA’ IN ULAL AN BIBLIA: «In ulalchik: Yab alwa’ ka kwé’en, ani jaits jajá’ an kwé’» (Romanos 2:21).

Bélits abal an tsákamchik u lej junkukúl, axi más in níts’biyal pel in tátajchik. Tam, an tatalábchik játs axi más in éjtowal kin exóbchij in tsakámil. Jaxtám, kwa’al kin punchij jun i alwa’ t’iplab.

«Walám ka tsalpay abal an tsakam yab in t’ajál ti kwéntaj jawa’ a uchál, pero max kit uk’pin o ka uluw jant’oj axi yab alwa’, dhúbatk’ij ne’ets ti ucha’chik. Walám ka tsalpay abal yabayej in éxbayal yan jant’oj, pero jajá’chik in tsu’uwtal patal jawa’ a t’ajál» (Nicole).

JAWA’ IN ULAL AN BIBLIA: Jitats pidhnének an tsalpadhtaláb axi tal k’al a Dios, yab u k’ambix (Santiago 3:17).

Ka tsalpay k’al axé’: «¿Jant’ini’ u tawnál u k’imadhil ani u tsakámil? ¿Jant’oj tam programas u kulbetnál ku met’a? ¿Jita’ u júnkuwal? ¿U kulbetnál ku tólmiy axi k’e’at?». ¿U lé’ abal tam ka puwey u tsakámil, ti kin nits’biy?

«U tomkíl ani naná’ expidh i konchal i tsakámil kin t’aja’ jawa’ wawá’ jayej i t’ajál» (Christine).

Ka konoy kit pákwlanchat. An tsákamchik in exlál abal tatá’ jayej it uk’pinal. Jaxtám, max a tsakámil kin tsu’uw abal tatá’ a kónoyal kit pákwlanchat, jajá’chik ne’ets kin exóbna’ kin tejwamédha’ i tsa’ataláb ani ets’ey kin uluw an chubaxtaláb.

«Kwa’al ki ólna’ tam ku uk’pin ani ki konoy ku pákwlanchat, antsaná’ i tsakámil ne’ets kin exóbna’ abal jayej kwa’al kin t’aja’» (Robin).