I magana ira nga makasta i ehemploda ay kukukuadda i ituttudduda. Angngariganna, ariammu ekspektan nga makkagi tu kurug i ana mu nu naginnana i pakkagim tu “Kagiammu tu awan ngà,” nu manaki mu nga kiyuvovugan i tolay nga minay ta balenu.

“Ari ma-ekspekta na magana ira nga kuan na ánada i kagiadda nu ariadda mismu kukukuan yatun. Kagitta na espongha i abbing ira. Malada i ngamin nga kakkagian anna kukukuattam, anna kagiadda nittam nu tanakuan i kukukuattam ta ituttuddu tam nira.”—David.

PRINSIPIO NA BIBLIA: “Ilammuyag mu, ‘Ari ka makkoko’ ngem makkoko ka!”​—Roma 2:21.

Mas dakal i influwensia na magana ira ta abbing anna ta tinedyer ira kumpara ta maski sinni—maski paga i kokkofudda. Egga kamu gafu ta kapianan nga posision tapenu igiya i ánanu ta fustu nga direksion​—basta kukukuannu i ituttuddunu.

“Posible nga pakatotoli tam kagian i tadday nga gannug ngem ariattam siguradu nu gigginnadda, ngem maski mittan laman nga ariattam kingngua i kinagi tam, ipamukada yatun nittam. Oobserban na ána ira i kukukuattam, maski nu abbo tam nga akkan.”​—Nicole.

PRINSIPIO NA BIBLIA: ‘I ka-uto nga maggafu ta langi ay ari tu minaggappa-appe.’​—Santiago 3:17.

Ikonsidera i mismu nga estandartem. Anni i klase ira na giri-girawammu? Kunnasi i pattratum ta atawam anna ána mu? Sinni ira i kofummu? Minangngikavurung ka kari? Kayà na kagian, sikaw kari i klase na tolay nga ikaya mu nga pabbalinan na ána mu?

“Kammi ipakua na atawà ta ánami i gannug nga kammi tuttuttulan.”​—Christine.

Makidispensa ta kamalim. Ammu na ána mu nga ari ka perfekto. Nu makkagi ka tu “sorry” nu kawagan​—ta atawam anna ta ána mu—metuddum i kinamapattalakkan anna kinapakalinno.

“Mawag nga maginna na ána tam nga aminattam i kamali tam anna makidispensa ittam. Nu ari, kadda gapa aminan nu nakkamali ira.”​—Robin.