ỌSI ENEBIỌMỌN
8: Ijiẹmhin
EBI A RE ỌLE TA
Ọkhẹke nin aba bi inẹn ha lu rẹkhan emhin nin ele man ọmọn nọnsele le. Bhi ọsi ijiẹmhin, ji a yọle ghe ọria dọ fẹ uwẹ ghe bhi uwa, ọkpakinọn ranmhude uwẹ iguanọ nin uwẹ ne ọne ọria talọ, uwẹ da je ọmọn nọnsẹ nọn taman ọne ọria ghe uwẹ iribhi uwa. Ahamiẹn inian uwẹ lu, lẹn sẹbhọ ghe ọmọn nọnsẹ dẹ re egbe khọkhọ uwẹ, yẹ ha bha ohoghe.
“Emhin nin ẹbho eso kẹ ta hi, ‘Lu emhin nin mẹn tale ọ iyi emhin nin mẹn lu.’ Ọnan ida wẹnna bhi egbe imọn nesẹ. Ọkhẹke nin mhan yere ghe otọ nọn biẹ eman, ọle eman khọ. Ahamiẹn emhin nin uwẹ lu bha diẹn mun ebi uwẹ ta, imọn nesẹ ida re obọ rẹkhan ebi uwẹ taman ele.
ADIA NỌN RIBHI BAIBO: “Uwẹ nọn wewe ọle yọle: ‘Bha hẹi ra,’ uwẹ be ra?”—Romans 2:21.
EBEZẸLE NỌN DA KHẸKE
Ijiẹmhin ọsi enebiọmọn, ọle imọn kẹ rẹkhan nẹ gbera ijiẹmhin ọsi ibo ele. Bhiriọ, obọ nọnsẹ ọ manman ye nin uwẹ rẹ re ijiẹmhin esili ọbhi otọ nin imọn nesẹ ha rẹkhan. Ọ wo khẹke nin uwẹ ha lu rẹkhan emhin nin uwẹ man imọn nesẹ le.
“Beji uwẹ rẹ man ọmọn nọnse emhin, uwẹ sabọ taman ọlẹn emhin nọn khẹke nin ọle ha lu. Uwẹ sabọ ha riale si ẹmhọn nin uwẹ ta mun ọle ẹlo kore. Ukpẹdẹ nan ha miẹn ghe uwẹ bha lu rẹkhan emhin nin uwẹ taman ọlẹn, ọle uwẹ ha lẹn sẹbhọ ghe ọle wo họn ebi uwẹ ta, yẹ gbẹlokotọ bhi ebi uwẹ lu.”—Nicole.
ADIA NỌN RIBHI BAIBO: “Ẹwanlẹn nọn na okhun vae . . . ido ẹki ikpunun.”—James 3:17.
EBI UWẸ HA SABỌ LU
Fẹ egbe nọnsẹn ghe. Ividio nela uwẹ ghe? Be uwẹ rẹ ne okhuo ẹ la ọdọ ẹ lu emhin yẹ? Be uwẹ rẹ ne imọn nesẹ lu emhin yẹ? Unan eria nela imọẹ nesẹ khin? Ẹmhọn ẹbho be rẹte uwẹ? Uwẹ dẹ be sabọ yọle ghe uwẹ guanọ nin imọn nesẹ diabe uwẹ?
“Imẹn bi ọdọ mẹn itaman imọn nesẹmhan nin ele ha nyẹnlẹn rẹkhan uwedẹ nin mhan tobọmhan isabọ nyẹnlẹn rẹkhan.”—Christine.
Ha bhii sade uwẹ rahiẹ ọria. Imọn nesẹ lẹnmhin ghe ọ bha gba nin uwẹ fo, ghe uwẹ dobọ ẹgheso. Uwẹ ha luẹ rẹ ha taman ene ribhi azagba-uwa nesẹ yọle: “Huẹan rẹbọ mẹn” imọn nesẹ ki luẹ bhi obọ ẹ ghe, ọkhẹke nin ele ha mhọn idegbere yẹ ha miẹnkue sade ele dobọ.
“Ọkhẹke nin mhan sira imọn nesẹmhan ha miẹnkue, yẹ bhii ọria nin mhan rahiẹ sade mhan dobọ. Ahamiẹn mhan bha lu iriọ, ele ki luẹ bhi obọ mhan re ha gbegue emhin nọn imhẹn nin ele lu.”—Robin.
“Ijiẹmhin ọsi enebiọmọn, ọle imọn kẹ rẹkhan nẹ, ranmhude, ele daghe uwedẹ nin ele rẹ lu emhin ẹghe rebhe. Emhin ne bunbun wo ribhọ nin ele luẹ ukpẹdẹ-ukpẹdẹ bhi ijiẹmhin nọnsẹmhan.”—Wendell.
