Іҷе-пабаларның сӧстері киректеріне килісчетселер ле, олар палаларына чахсы кӧзідім поларлар. Сірер палаларыңның кӧзіне телефоннаң пастығыңарға мин ағырчам тіп чойланчатсар, че постарыңар тынанып аларға хынчатсар, палаларың ідӧк чойлан сыхпас па?

«Палаларға пістің кӧзідімібіс сӧстерібістең артых влиять полча. Пістің киректерібіс сӧстерібіснең киліспинчетселер, олар піске анзын хайди даа чоохтап пирерлер» (Дэвид).

БИБЛИЯДАҒЫ ПРИНЦИП: «Хайди син, пасхаларын ӱгретчедіп, позыңны ӱгретпинчезің. „Оғырлаба“ тіп ӱгретчедіп, оғырлапчазың» (Римдегілерге 2:21, НТ).

Іҷе-пабалар палаларына оларның арғыстарынаң хай-хай артых влиять полчалар. Олар палаларының чуртастарында иң аарлығ кізілер полчалар. Сірернің сӧстерің киректеріңнең чара парбинчатсалар, палаларыңа орта чолҷа парарға полыс пирерзер.

«Палаңарға пірее нимені чӱс тее хатап чоохтапчатсаң, ол испинчеткенге тӧӧй, че пір ле хатап сӧстеріңе киліспес иде тудыныбыссаң, ол анзын сах андох сизін салча! Пірееде палалар пір дее ниме сизінминчелер тіп сағынчабыс, че сынында олар прай ниме сизінчелер» (Николь).

БИБЛИЯДАҒЫ ПРИНЦИП: «Кізінің ӧӧртін килген хыйғазы... чойырхабас ниме» (Иаковтың 3:17).

Нормаларыңны сыныхтабызыңар. Хайдағ фильмнер кӧрчезер? Иріңернең, ипчіңернең паза палаларыңнаң хайди тудынчазар? Кем сірернің нанҷыларың? Пасхаларына полысчазар ба? Палаңар сірер осхас ползын тіп хынчазар ба?

«Піс ирімнең постарыбыс итпинчеткен нимелерні палаларыбыстаң киректебинчебіс» (Кристин).

Пыроңарны тастазыннар тіп сурыныңар. Сірер чазыхтығ кізізер, палаларың аны пілчелер. Иріңнең алай ипчіңнең паза палаларыңнаң «пыром таста» тіп сурынчатсар, сын тудынарында паза пасхаларын улуғлирында кӧзідім полчазар.

«Палаларыбыс пыросынчатханнарыбысты паза алҷаастарыбысты олардаң чазырбинчатханыбысты кӧрерге киректер. Піс іди итпезебіс, палалар пыросынарға хаҷан даа ӱгрен полбастар» (Робин).