OKWA BABUTHI
8: Eky’erileberyako
EKYA KIKAMANYISAYA
Ababuthi abakahiraho eky’erileberyako ekyuwene bakakolha ebyo bakabugha. Nga hathya, siwanga lengekania nahake wuthi omwana wawu akendibya w’okwenene amabya iniabiriowa wukabugha wuthi, “Wumubwire wuthi singaliho,” omughulhu wangabya isiwanzire erikania n’omundu oyuwamahika ewawu.
“Hane akasimu akakabugha kathi ‘Wukole ebya ngabugha, butsira ebya ngakolha.’ Aliwe eki si kyanga kolha okwa baana. Bali ng’epamba indi bakanyunyira obuli kindu ekya thukabugha n’erikolha, kandi ibakendi thubwira eky’erileberyako kyethu kyamathendi hambangana n’ebya thukalengaho eribakangirirya.”—David.
OMUSINGYI WE BIBLIA: “Iwe wukathulhagho wuthi, omundu syibe, nawu wuk’iba kwehi?”—Abanya Roma 2:21.
EKIKALEKA IKYABYA KIKULHU
Abaana balere n’abalengwa bakagherereraya ababuthi babu kwilhaba owundi mundu wosi-wosi—imwamuli n’ab’emyaka yabu. Eki kikakanganaya kithi n’iwe wanga thoka ndeke eriwathikya abaana bawu erikolha ekitholere—ekikulhu, iry’eribya iwunemukolha ebya wukabakangiriraya.
“Thwangana subirira omo mwatsi mughumerere mirundi kikumi n’eribulha omwana wethu ng’anathuhulikirire, aliwe ekiro thukalemawa erikolha ngoku thukabugha, omwana akalhuaho iniakilhangira n’erithubwira. Abaana bakasamalira ebyosi ebya thukakolha, nibya nomuthwanga lengekania thuthi siba thulhangire.”—Nicole.
OMUSINGYI WE BIBLIA: “Amenge awakalhua endatha, . . . syali yithendereraya.”—Yakobo 3:17.
EKYA WANGAKOLHA
Lebaya ebya wukaghenderako omo ngebe. Ni by’eriyitsemesya nga byahi ebya wukasombolha? Wukathwalha wuthi omwanze wawu n’abaana bawu? Wuwithe abanywani abali bathi? Wukanalengekanaya okwa bandi? Omwa bikuhi, wunanzire abaana bawu ibabya ng’iwe?
“Ingye na mwira waghe sithuli bwira abaana bethu thuthi bakole ebya thuthekolha.”—Christine.
Wamasobya, saba ekighanyiro. Abaana bawu banasi ngoku wuthahikene. Omw’ibwira omwanze wawu n’abaana wuthi “Nyighanyire” wamasobya—iwukendibya iwukakangiriraya abaana bawu eribya b’okwenene n’eriyikehya.
“Abaana bethu batholere ibowa thukaligha esobya yethu kandi n’eriowa thukasaba ekighanyiro thwamasobya. Thwamathendi kolha thuthya, ibakend’igha eribya bakabisirira esyosobya syabu.”—Robin.
“Ng’ababuthi, ebya thukakolha bikahamba kutsibu okwa baana bethu, kandi eky’erileberyako kyethu ky’ekindu kikulhu kutsibu omw’ibakangirirya kundi bakabya ibanathusamalire endambi yosi. Eky’erileberyako kyethu kiri ng’ekitabu ekikabya ikinasanzwire ekya baana bangabana mw’amasomo oko ndambi yosi-yosi.”—Wendell.
