LE KALAŊ CHUAUWA
8: Tamaseliiyo
NYƐ O SIMNDO
Kalaŋ chuauwaa kɛsi tamasi kɛndɔɔ wa, nyɛ nda pɛɛku chuauwaa ndaa wo, ndu koni nda bɛɛ tosa ni. Le tamaseliiyo, te a yeema ma soo o wana hiŋ naa num chua wo lo le, o wa ikala le mi po numndo dimi tonyaa te o tuei num pɛ dimioo aa, “Dimul ndu aa I cho naŋ te.”
“Miŋ tuei wanaa bɔɔbɔɔ hau dimioo aa, ‘Tosa nyɛ ya I dimi wo, kɛ o cho nyɛ ya cho tosaa wo le.’ Kɛ sila waa nuaa niŋ kposoŋ le chuaambuaa le. Chuaambuaa cho ko maa nyɛ fɔɔndiɔŋ sɔsa mɛŋndaŋ ndo. Nyɛ o nyɛ naŋ dimi nduyɛ miŋ tosa, ndu nda bɛɛ tosa ni. Mi kaala ndalaŋ la chɔm kpendekele maa tamasi naa, o chɛlaŋ a nyɛ naŋ cho nda pɛɛkoo wo le.”—Deeve.
SAWA MANDAA BAABUIYO: “A cho waŋnda pɛɛkoo aa, ‘La yɔŋ levii le,’ kɛ ma yɔŋ pa viileŋ?”—Luomaŋnda 2:21.
LE YƐƐ HEI CHO YƐ SUƐI SƆVƐ?
Kaa kalaŋ chuauwa piiliaŋ chuaambuaa a feleŋguaa mbo hiau wana o wana. Koŋ chɔm ni maa nya kalaŋ chuauwa kpeekpei nɔ ni mi la chɔm chuauwaa nyaa nɛi nda nɔ ma kuɛ choo wo, te o yɔŋ pɛ mi nyapila wa nyɛ nya cho nda pɛɛkoo wo dɔwɔɔ o wali niŋ.
“Naapum miŋ dimi suɛi pilɛi le bɛmbɔɔ kɛmɛ, nduyɛ miŋ yiyaŋ maa po naa ɔɔ chua naa cho lani yaŋɔɔ le. Kɛ paale naŋ cho tosa nyɛ naŋ dimi wo le, ma dimul naa a ndi okɔɔ. Mi chuaambuaa kɛsi hɔlteŋ o nyɛ o nyɛ naŋ wa tosaa choo, o yɔŋ bɛɛ miŋ yiyaŋ maa a cho sina le.”—Nikɔl.
SAWA MANDAA BAABUIYO: “Taasi chɛŋ o choo choo niŋndo . . ., o mulu muluŋ te.”—Chemisi 3:17.
NYƐ Ŋ NƆ MA TOSA WO
Mɛɛndiaŋ kaala numndaŋ. Yelelaŋ suu kuɛɛ ŋ hɛnaŋ yɛ tau? Vɛɛ ŋ bii yɛ wana nya cho o nɔɔ niŋndo vɛlɛ a chuauwaa numnda? Nɛɛ yaa cho yɛ chaaŋaa numnda? Baa ma yiyaŋ pa a wanaa cheleŋ okɔɔ? Le suɛi vilɛiye kiolɔɔ i biŋgi, baa wana suu ŋ cho wo ŋ yeema ni mi chuauwaa numnda bɛɛ a wa?
“Ya naa pɔnɔ nuu, ŋ dimul chuauwaa naa le ma tosa nyɛ naapila ŋ cho tosa le wo le.”—Kilisiŋ.
Nyɔɔlu te a benduŋ pɛ. Chuauwaa numnda sina maa wana hakioo ŋ cho ni. Te a dimi pɛ aa “Mal haki” a teleŋ o bɛnda wo, mɛɛ a cho wana nya cho o nɔɔ niŋndo, a chuauwaa numnda tamasi kɛndɔɔ kɛsullo le waa sakpo vɛlɛ a tusiŋndo okɔɔ.
“Te ŋ benduŋ pɛ, ŋ nɔ miŋ tosa mi chuauwaa naa sina maa ŋ chɛl biondɔŋ naa, nduyɛ ma sina maa ŋ nyɔɔlu le biondɔŋ naa. Te ŋ tosa lende le, nda bɛɛ benduŋ pɛ siɔdii a cho dimi le.”—Lobiŋ.
“Naa kalaŋ chuauwa, kaa naa piiliaŋ chuauwaa naa tau. Nduyɛ tamasi naa mala nda tau ni kanifuule, a cho chɔɔ nyɛ naŋ tosa wo teleŋ o teleŋ. Sɔɔŋ naŋ tosa o yoomoo niŋndoŋ cho ko maa pɛɛkoo naŋ wa koŋ chuauwaa naa lepaa o lepaa ni.”—Wiŋndɛl.
