KYE MAMBʼAJ
8 Kyqʼonkuye tbʼanel techel kywitz
¿TIʼ T-XILEN?
Tuʼn tkubʼ qqʼoʼn jun tbʼanel techel, atz in yolin jlu tiʼj tuʼn tkubʼ qanqʼin aju in xi qxnaqʼtzaʼn. Mlay txi tqʼamaʼn jun mambʼaj te tkʼwal tuʼn miʼn tyolin tiʼj nya ax tok yol qa otoq tzʼok tbʼiʼn kʼwalbʼaj qa in xi tqʼamaʼn tman qa mintiʼ at aj kypon xjal jyol te.
«Nim xjal in xi kyqʼamaʼn jlu: ‹Bʼinchanxa aju in xi nqʼamaʼne ex nya aju in bʼant wuʼne›, pero mintiʼ in nonin jlu kyiʼj kʼwal. In che ok ik tzeʼn jun esponja tuʼnju jun rat in nel kykanoʼn aju in xi qqʼamaʼn ex aju in bʼant quʼn. Qa in xi qyekʼin jun tiʼ kye ex mintiʼ in kubʼ qbʼinchaʼn, kʼelel kynikʼ tiʼj ex tzul kyqʼamaʼn qe» (David).
NABʼIL TOJ TYOL DIOS: «Aya in pakbʼan kye xjal tuʼn miʼn kyelqʼan, ¿yajtzun teya, tiquʼntzun in elqʼaʼna?» (Romanos 2:21).
¿TIQUʼN NIM TOKLEN?
Aʼye mambʼaj in che ok te jun tbʼanel techel kywitz kykʼwal ex nya jun kyukʼil toj escuela, axpe ikx aj kyokx toj kykuʼxumal. A t-xilen jlu qa aʼye mambʼaj jaku che onin kyiʼj kykʼwal tuʼn tjaw kyjyoʼn aju mas bʼaʼn, pero oʼkx jaku che onin kyiʼj qa ma kubʼ kyqʼoʼn jun tbʼanel techel kywitz.
«Jaku txi qqʼamaʼn jun tiʼ nimku maj kye kʼwal ex jaku kubʼ qximen qa mintiʼ in xi kybʼiʼn qyol. Noqtzun tuʼnj, qa mintiʼ ma txi qbʼinchaʼn aju in xi qqʼamaʼn, jun rat tzul kyqʼamaʼn qe. Tok kywitz tiʼj tkyaqilju in bʼant quʼn, maske mintiʼ in nel qnikʼ tiʼj» (Nicole).
NABʼIL TOJ TYOL DIOS: «Aju nabʼil in tzaj tqʼoʼn Dios, mya xmletzʼ» (Santiago 3:17).
¿TIʼ JAKU BʼANT TUʼNA?
Bʼaʼn tuʼn tkubʼ t-xjelina jlu: «¿Tiʼ nmode in kubʼ nyekʼine tiʼj nxuʼjile ex kyiʼj nkʼwale? ¿Alkyeqe programa in nok nkeʼyine toj televisión? ¿Alkyeqe wamiwe ateʼ? ¿In chin ximane kyiʼj txqantl?». Toj juntl yol, ¿tajpe teya tuʼn tpon jun qʼij tuʼn kyok tkʼwala ik tzeʼn teya?
«Mintiʼ in xi nqʼamaʼne tukʼil nchmile kye wale tuʼn t-xi kybʼinchaʼn junjun tiʼchaq qa mintiʼ in bʼant jlu quʼne» (Christine).
Qaninxa najsam. Ojtzqiʼn kyuʼn kʼwal qa nya tzʼaqli qe kyman. Tuʼntzunju, qa ma txi tqanina najsam te tukʼila moqa kye tkʼwala aj tel txalpaja, in xi tyekʼina kye qa mlay bʼant tkyaqil quʼn ex qa nim toklen tuʼn tkubʼ qin qibʼ.
«Il tiʼj tuʼn tjatz qqʼamaʼn tiʼ in qo el txalpaj tiʼj ex tuʼn t-xi qqanin najsam. Qa mintiʼ ma bʼant jlu quʼn, mlay bʼant kyuʼn kʼwal» (Robin).
«Nim jaku che onin mambʼaj kyiʼj kykʼwal. Tuʼntzunju, nim toklen tuʼn tkubʼ kyqʼoʼn jun tbʼanel techel kywitz tuʼnju atzun jlu mas in nok kykeʼyin. In qo ok ik tzeʼn jun libro jaqoʼn aj tex qʼij ex jaku jatz kyiʼn jun xnaqʼtzbʼil toj toj alkyexku or» (Wendell).
