ȲWOTꞌĪN NYꞌĪN KAPIAT
8. Ewehoꞌomūꞌe eimempytꞌīn eiminug̃ koꞌi puo pyi
AIKOTĀ̃ MEIG̃.
Ȳwotꞌīn nyꞌīn waku taꞌatunug̃ aikotā̃ taꞌatuehay hap ewy. Maꞌato asuwe miꞌiria heso heso iꞌatuehay. Kotā̃ e hap. Miotā̃ teꞌeroꞌe — Ehay teiꞌo eheheso hap koꞌi iꞌatuꞌe taꞌatumepytꞌīn me. Maꞌato karāmpe wentup mīt putꞌokꞌe iꞌatuyat kape hawyi tuwat terānꞌi hewowi taꞌatupoꞌoro taꞌatumepytꞌīn ihay hamo — Uity sio uiȳwot tuwẽtem. Miꞌi hap heso neꞌi. Meketā̃ hap emempytꞌīn ihay hamo heso hap koꞌi ewy.
David e hap het rakat toꞌe — Hirokaria teꞌerehaꞌat kahato aiminug̃ koꞌi kape miꞌi pote taꞌatuhaꞌag̃ kahato aiminug̃ koꞌi. Ȳt watunug̃ꞌi aikotā̃ aiꞌe hap ewy pote taꞌatukuap hamo aheheso hap koꞌi e.
TUPANA EHAY HENOI — Ȳt seroꞌok eweiꞌe teiꞌo watoꞌe iraniaꞌīn me pote waku iꞌewȳte ȳt seroꞌok e hat woꞌi watopyhuꞌat aipotminãpin hap ewy e. — Humanu 2:21.
KAT POTE MIꞌITĀ̃ WAKU.
Eimempytꞌīn tukupteꞌen kahato iraniaꞌīn mītꞌīn wȳwo escola pe maꞌato waku poꞌog̃ ewehoꞌomūꞌe eimempytꞌīn waku rakat nug̃ hamuat hap ete. Maꞌato waku ewetunug̃ aikotā̃ eiꞌe hap ewy.
Nicole e hap het rakat toꞌe — Asuwe wahoꞌomūꞌe kahato aimempytꞌīn me kan waku rakat nug̃ hamo maꞌato watikuap kahatoꞌi miꞌiria teꞌeruwanentup sio ȳtꞌi aimienoi koꞌi kape hap. Maꞌato ȳt watunug̃ꞌi aikotā̃ aiꞌe hap ewy pote miꞌiria taꞌatukuap hamo neꞌi miꞌi hawyi teꞌeroꞌe kuap ahepe — Ȳt etunug̃ꞌi aikotā̃ emienoi ewy e.
TUPANA EHAY HENOI — Waku ȳt typy ehay rakaria wo eweikupteꞌen e. — Tiaku 3:17
KAN WAKU ETUNUG̃.
Erenentup kan waku epe sio nakuꞌi rakat epe. Aikowan filme koꞌi erehaꞌat. Etimoherep ewoꞌokyꞌe hap ewyriaꞌīn upi sio ȳt. Uweꞌīn etiꞌaira ewyꞌok wo tukupteꞌen hamo. Erenentup kahato mītꞌīn kape. Waku erenentup meig̃muewuaria apoꞌe hap koꞌi kape hawyi erenentup poꞌog̃ — Atikyꞌesat uimepyt itag̃ hawyi tutunug̃ aikotā̃ uiminug̃ koꞌi ewywuat.
Christine e hap het rakat toꞌe — Uito hawyi uheꞌaito — Ewetunug̃ o tuweupi uruminug̃ koꞌi kai ȳt uruehayꞌi urumempytꞌīn me. Maꞌato urutunug̃ uruꞌe hap ewy pote miꞌiria taꞌatuhaꞌag̃ kuap uruminug̃ wakuat koꞌi e.
Etiꞌaparap pote uiwepyiꞌi waku ere. Emempytꞌīn tikuap torānia aitoria iꞌaparap haria watoig̃neꞌen miꞌi pote etiꞌaparap pote waku ere uiwepyꞌi ere. Meketā̃ hap heremo ȳt eremowatoꞌi miꞌi hawyi emepytꞌin ehaꞌag̃ kuap hamo.
Robin e hap het rakat toꞌe — Watiꞌaparap pote waku uiwepyiꞌi waku watoꞌe. Miꞌitā̃ mote aimempytꞌīn iꞌaparap aru ȳt teꞌeruwemig̃ꞌi aipupi e.
Wendell e hap het rakat toꞌe — Waku watunug̃ waku rakat yn kat pote aimempytꞌīn teꞌerehaꞌat kahato ahewowi. Aiminug̃ koꞌi puo pyi wahoꞌomūꞌe kahato kuap aimempytꞌīn waku rakat nug̃ hamo e.
