Yo tata ñe yo nana ke nee ra jichiji na joo yo trʼii, minji janzi ga jichiji. Nzakja ma na jyoo ra xipji o trʼii ke ra mama ke dya bʼꞹbʼꞹ ma kjo ra pꞹtrʼꞹ kʼe ngoxtrji nange dya nee ra mbedye, nuʼma dya søø ra ndebʼe ke o trʼii ra mama kʼo na kjuana.

“Na punkjꞹ tee manji: ʼRi tsjaa kʼo ri xitsʼi, dya nge kʼo ri kjagøʼ, pe nuyo dya pjøsʼꞹ yo trʼii ra tsjaji yo na joo. Yo trʼii ixi chjenjui na esponja, dabaditjo pjechiji texe kʼo ri manji ñe kʼo ri kjaji. Ma pje ri jichiji pe dya ri kjagøji akjanu, angezeji ra unꞹji nguenda ñe ra xitsiji” (David).

NE BIBLIA JIZHI: “Nutsʼkʼeji in zopjꞹji yo ntee in xipjiji dya pje ra po̱nꞹji, ¿jenga in po̱nꞹgeji?” (Romanos 2:21).

Dya kjo søø ra mbøsʼꞹji yo trʼii ñe yo xutrʼi ra juajnꞹji pje ra tsjaji nzakja nu jyoo ñe nu jñꞹꞹ, ni ri nge o dyojui kja kolegio, xo ñeje yo ya trjatrʼi ñe yo trjaxutrʼi xo kjaji nzakja o jyoo ñe o jñꞹꞹ. Nuyo nee ra mama ke ngetsʼkʼeji jyoo ñe jñꞹꞹ ke nda søø ri pjøsʼꞹji yo in chʼii ra minji na joo ma nutsʼkʼeji xo ri tsjaji kʼo na joo.

“Bʼꞹma ra yepeji ra yepeji na jñaa ma pje ri xipjiji yo in chʼii, ñe dya ri pa̱rgøji ma ⱥrⱥji maxke iyo, pe ma dya ra kjagøji kʼo ya ro xipjiji, dabaditrjo ra unꞹji nguenda ñe ra xitsʼkøji. Angezeji pjøtpꞹji na joo nguenda texe kʼo ri kjagøji, zø dya ñetse” (Nicole).

NE BIBLIA JIZHI: “Pero ma nge Mizhokjimi kʼꞹ dakøji rga pa̱ra̱gøji, [...] kʼo ra kjijñiji kʼo na kjuana, nge kʼo ra mamajikʼo, dya ra pezheji o bʼɇchjine” (Santiago 3:17).

Ri dyonꞹtsjɇ. “¿Ja ga ngetsʼkʼø ko in suu o in xira ñe yo in chʼii? ¿Jaga kjaa yo ri janda kja kʼe televisión maxke celular? ¿Kjo nge yo in jobigo? ¿Ri nee ra pjøsʼꞹ yo dyaja?”. Xo ñeje, “¿ri negø ke yo in chʼii ma ra teji ra ngeji nzakjazgø?”

“In xiragø ñezgø dya ri otꞹbʼe yo in chʼii ra tsjaji kʼo dya ri kjagobʼe” (Christine)

Dyotꞹ ra perdonaotsʼꞹ. Yo in chʼii pa̱ra̱ji ke dya ngetsʼkʼe perfecto. Ngekʼua ma ri xipji “pongatrjo in suu o in xira maxke in chʼii, ri jichima yo in chʼii ra pjeta ndeptjoji ñe ra mamaji kʼo na kjuana.

“Me na joo ke yo in chʼii ra dyⱥrⱥji ke gi unꞹ nguenrra ma dya bi tsjaa na joo, xo ma ri dyotꞹ ra perdonaotsʼꞹ, nange ma dya ri tsjaa akjanu, angezeji dya xo ra tsjaji” (Robin).