Avyazi aaya icilangililo cisuma yakacita kulingana na vino yakasambilizya. Mutanga mwenekele umwana ukuya uwa cisinka ndi cakuti akuvwa mukulanda amazwi wakwe, “Munene uti yasipo” ndi cakuti musikulonda kulanda nu wataiza.

“Yamwi yakati, ‘Cita vino nkukunena, utakonkelezya vino nkacita.’ Nomba amazwi amusango uu yasiomba ku ana. Yapala pamba aakaonka icili consi, yene yakalola vyonsi vino mukulanda nanti ukucita, nupya yakalandilapo sile ndi cakuti na vino mukuyanena asi vino mukacita.”—David.

CISINTE CA MULI BAIBO: “Wemo ukakosola uti, “Utaiya” lino wemo ukaiya.”—Loma 2:21.

Ana alino na acance yakakonkelezya sana vino avyazi yao yakacita kuluta muntu ali wensi nanti sile auze yano yakacina nayo. Fwandi cii cikusenula ukuti mwe yavyazi mwemwe mungasunda ningo ana mu nzila isuma, ni cingamwazwa, u kucita vivi kwene vino mukuyasambilizya.

“Tungaswilizya kulanda pa cintu conga kwene imiku ingi nu kulola kwati umwana asikuvwa, lelo uwanda uno tulafilwa ukucita vino tukalanda, tuluvwa sile umwana walandapo pa cintu cico. Ana yakaika sana mano kuli vino tukacita, nanti icakuti tukulola kwati yatasumvileko mano.”—Nicole.

CISINTE CA MULI BAIBO: “Mano yano yakafuma kwi yulu . . . yakatulenga kuntakwata usomvi.” —Yakobo 3:17.

Mwaikako sana mano kuli vino mukacita. Uzye i vyakuizanzya ci vino mukatamba? Uzye mukasunga uli ya winu na ana inu? Uzye aacuza ya musango ci yano mwakwata? Uzye mukalangulukilako antu yauze? Fwandi mukusondwelela tungati uzye mukacita vino mungatemwa ana inu yakolanya?

“Ya wane nani tusipatikizya ana ukucita vino swemo tusicita.”—Christine.

Mwalenga uwelelo pali vino mwaluvyanya. Ana inu yamanya ukuti mutamalilika. Ndi cakuti mwalanda amazwi yakuti “munjeleleko”, ya winu na ana yalalola ukuti mwaya acisinka nupya mwaicefya nayo kwene yalalondesya kumukolanya.

“Ana itu yalinzile ukuvwa kuno tukuzumila ukuti ituluvyanya na lino tukulenga uwelelo kuli vino ituluvyanya. Nga tusikucita vivyo, yalasambilila ukufisa nga yaluvyanya.”—Robin.