KULI MAKOLO
8: Kupeleka chisanzo
VAMENE VUCHITIKA
Makolo amene okonkheja vakuphunzisa opeleka chisanzo chiweme kuli ŵana ŵawo. Vingankhale vovuta kuti mwana wanu akolaŵila vinthu vachendi koma mwewo mulaŵila vinthu vawenye. Mwachisanzo, keno kung’anda kwanu kwawela munthu muyakine lomba mufunalini kulaŵila naye, payakine munena kuti, “Munene kuti nafumapo.”
David enena kuti—“Makolo anyinji okonda kunena kuti, ‘Osaloleshesha vanuchita, mukochita tyala vanukuujani.’ Vamene ivi vupelekalini chisanzo chiweme kuli ŵana. Ŵana otolela chilichonse chamunena komasoti chamuchita. Keno vatuŵauja vukatijanalini na vatuchita, ŵana nawo owonasoti vamene ivo.”
MFUNDO YA M’BAIBOLO: “Wewo wamene ulalikila kuti ‘Osaiŵa,’ uiŵasoti kansi?”—Aroma 2:21.
NDAŴA YANJI KUGANIZILA NKHANI YAMENE IYI N’KOFUNIKA?
Ŵana atontho-atontho na achilumbwana otolela ngako vakuchita makolo ŵawo kupambana vakuwona kuli ŵanthu ayakine—komasoti kuli ayawo. Vamene ivi vuwonesha kuti makolo ofunika kupeleka chisanzo chiweme—pakuphunzisa ŵana ŵawo. Tetyo vamulaŵila vufunika vikokatijana na vamuchita.
Nicole enena kuti—“Nthawe ziyakine mungalaŵile vinthu viyakine moweleja-weleja chifukwa choganiza kuti mwana wanu akumvwalini. Koma nsiku iyakine mukazachita vinthu vosiyana na vala vemwenzelaŵila, mwana wanu azaziŵe vamene ivo. Ŵana ololeshesha vatuchita ndipo osaganiza kuti paliye chakuziŵa.”
MFUNDO YA M’BAIBOLO: “Nzelu yofumila kululu, . . . iliye chinyengo.”—Yakobo 3:17.
VAMUNGACHITE
Mukoganizila vamuchita. Kansi mukonda kulolela mafilimu otyani? Kansi muwonesha nkhalidwe yotyani kuli mwanalume olo mwanakazi wanu komasoti kuli ŵana ŵanu? Kansi mukonda kutandala na ŵanthu otyani? Kansi muchita vinthu moganizila ayakine? Mosaluta kutali tingakonshe kuti, kansi vamuchita niye vamufuna kuti ŵana ŵanu atoleleko?
A Christine enena kuti—“Newo na mwanalume wangu tukakamijalini ŵana ŵasu kuchita vinthu vatisachita sewo.”
Mukopepesa mukaphoniyesha. Ŵana ŵanu oziŵa kuti nthawe ziyakine namwe muphoniyesha vinthu ndipo mungafunike kunena kuti “sole” keno mpofunikila—tetyo tonse funika kupepesa kuli mwanalume olo mwanakazi wasu komasoti kuli ŵana ŵasu—mukochita tetyo niye kuti muŵaphunzisa kunkhala okhulupilika komasoti kunkhala olichefya.
A Robin enena kuti—“Sewo makolo tufunika tikovomekeja tikaphoniyesha vinthu ndipo tikopepesa. Koma keno tingachitelini tetyo ŵana ŵasu nawo angovomekejalini akaphoniyesha vinthu.”
