Ove ine wahanda ovana vove vapopie otyili, kupondola okuti tyina meumbo muya omuenda, opopila omona okuti: “Enda-ko uti meumbo omukulu kemo.”

“Ovanthu vehole okupopila ovana vavo okuti: ‘Linga vala etyi ndyikupopila, mahi etyi ame ndyilinga wehetyilinge.’ Mahi ovana hatyo-ko vapopilwa ngotyo mokonda ovana vekahi ngolukutau. Ine etyi tuvepopila tyilipona netyi tulinga, nthiki imwe mavetyipopi umwe avati: ‘No ove ngoti monthiki yo ngandi wetyilingile.’ ” — David.

ONONDUNGE MBO MBIMBILIYA: “Ove [wokulongesa] okuti ‘Uhavake,’ uvaka?” — Ova Loma 2:21.

Ovana ovatutu, no vokuekula-le katutu, velilongesila vali ko vohe tyipona ku ava valongeswa navo kosikola. Naina vokuna otyilinga tyokulongesa ovana etyi tyaviuka netyi tyapenga, onwe yatyo ovohe. Mahi apeho hinangelei okuti muna okulinga etyi muvepopila.

“Pamwe omona, uti umwe opopi opaleka-po vali, mahi otyo wehetyii ine wetyikwata-po umwe. Mahi ine nthiki imwe tuti atupopi tyimwe, mahi atulingi otyikwavo, omona metyimono etupopila-tyo. Ovana vamona umwe atyiho etyi tulinga, na tyina umwe tusoka okuti hamwe kavetuete-ale.” — Nicole.

ONONDUNGE MBO MBIMBILIYA: “Ounongo wo keulu utupu omaandambeyo.” — Tiaku 3:17.

Litala ove muene etyi ukahi. Ovipuka patyi uhole okutala mo televisau? Oñgeni utekula mukwenyi meumbo novana? Ovalie omapanga ove? Okuti usuka na vakwenyi? Lipula ngetyi: ‘Okuti ovipuka ame ndyilinga ovio ndyihanda ñgeno ovio omona wange alinga?

“Onthwe katutumu ovana vetu valinge otyipuka onthwe tuahalingi.” — Christine.

Ita otyiponyo tyina wamapengesa. Ovana vove vetyii-ale okuti no ove pamwe upengesa. Nga walinga otyipuka tyimwe tyapenga, veita otyiponyo. Ine otyo ulinga ngotyo, ovana venyi mavetyimono okuti ove ukahi nawa, utupu omalityindailo.

“Ine onthwe katuiti otyiponyo kovana vetu, navo tyina vamapengesa mavetyiholeka.”— Robin.