PARENTS
8: Gud Example
WANEM HEM MINIM
Parents wea showimaot gudfala example bae duim wanem olketa teachim long pikinini. Olsem example, bae hem hard for iu teachim pikinini for honest sapos hem herem iu sei, “Talem hem mi no stap,” taem iu no laek for story long samwan wea kam long haos.
“Staka pipol savve sei ‘Duim wanem mi talem, no duim wanem mi duim.’ Bat hem hard for pikinini followim datwan. Olketa pikinini savve gud long wanem iumi talem and duim, and bae olketa talem iumi taem olketa lukim wanem iumi duim hem no followim wanem iumi talem.”—David.
BIBLE PRINCIPLE: “Nogud iu sei olsem long narawan, ‘Iu no steal,’ batawea, iu nao iu steal.”—Rome 2:21.
WHY HEM IMPORTANT
Example bilong parents savve barava affectim olketa pikinini and teenager winim example bilong olketa nara young wan. Diswan minim iufala parents nao best wan for teachim pikinini for duim stret samting. Bat iufala seleva mas followim wanem iufala teachim.
“Maet iumi talem sem samting staka taem bat iumi no sure sapos pikinini hem herem, bat wanfala taem iumi no duim datfala samting iumi talem, hem bae talem long iumi. Olketa pikinini lukim evri samting iumi duim, nomata iumi tingse olketa no lukim.”—Nicole.
BIBLE PRINCIPLE: “Wisdom from heven hem mekem man for . . . no laea.”—James 3:17.
WANEM IU SAVVE DUIM
Lukluk long example bilong iuseleva. Wanem kaen movie nao iu lukluk long hem? Hao nao iu treatim marit partner and olketa pikinini? Wanem kaen pipol nao fren bilong iu? Waswe, hem wei bilong iu for tingim nara pipol? Waswe, iu showimaot gudfala example for olketa pikinini bilong iu?
“Samting wea mi and hasband bilong mi talem olketa pikinini for no duim, mitufala tu no duim.”—Christine.
Sei sorre taem iu duim mistek. Olketa pikinini bilong iu savve finis iu no perfect. Sapos iu sei sorre long marit partner and olketa pikinini taem iu duim mistek, datwan bae helpem olketa pikinini for lane for honest and hambol.
“Taem iumi duim samting wea no stret, olketa pikinini laek for herem taem iumi talem iumi nao rong, and for herem iumi sei sorre. Sapos iumi no duim olsem, bae olketa pikinini lane for haedem mistek bilong olketa.”—Robin.
“Main wan wea olketa pikinini savve lane from nao hem iumi olketa parents, and example iumi showimaot hem nambawan tul bikos olketa evritaem lukim datwan. Olketa gohed for lane from example wea parents showimaot evriday.”—Wendell.
Iu Laek Lukim Nara Samting?
WASTAOA
Teachim Pikinini for Iusim Gudfala Tingting
Hao nao example bilong Jesus savve helpem iufala dadi and mami for teachim gud olketa pikinini bilong iufala?
