KEH TAQEH AJABʼEES
8. Rukʼuhtjiik keh ruukʼ bʼanooj
¿CHAJARIK IRAAJ RUQʼOROM?
Noq inakʼachareej wach reʼ inakʼuhtaaj keh ahalakʼuun, ne inkitijej aholohik naʼojbʼal. Jenoʼ ajabʼees maʼ ne ta iruyʼeej chi reʼ rakʼuun juneliik ne ruqʼor i korik, noq reʼ ajabʼees iruchuk qʼorik, jeʼ rukabʼ noq inkitzʼaʼaj i puerta reʼ ajabʼees iruqʼor: «chaqʼor chi maʼ wilkiin ta».
«Kʼih taqeh kʼachareel inkiqʼor: «Mabʼan aweh i nubʼan i hin, reʼ laʼ naabʼanam reʼ i nuqʼor aweh», xa reʼ laʼ, reʼ wilih maʼ inkamanik ta keh i halakʼun. Reʼ keh inkibʼan keh, reʼ inqabʼan eh reʼ inqaqʼor. Noq reʼ hoj inqayeew kinaʼojbʼal eh tokoom chik inqabʼan, ne inkikoj rehtaal eh ne inkiqʼor qeh» (David).
NAʼOJBʼAL REH I SANTO LAJ HUUJ: «Wilaʼ naqʼor chi maʼ toobʼ taj i leqʼ, ¿chibʼih reet noq ko na aʼn woʼ aweh i leqʼ i hat?» (Romanos 2:21).
¿CHAJ WOʼ REET KORUMAN?
Xa reʼ woʼ taqeh ajabʼees inkʼamwik kibʼeeh taqeh kihalakʼuun, maʼ reʼ taj i kuchʼihiil pan tijinbʼal, jeʼ woʼ pan kikʼijolaal. Hat taq ajabʼees, reʼ wilih iraaj ruqʼorom, chi xa reʼ woʼ taq i hat ne nakʼuhtaaj keh i holohik laj naʼojbʼal taq ahalakʼuun. Xa reʼ laʼ chabʼan taq i kʼahchiʼ akʼuhtaam.
«Maʼ qojqʼuhtik taj chi ruqʼorariik keh i qahalakʼuun eh mareh maʼ qehtʼal ta mi kʼahchiʼ kooj kibʼiram, xa reʼ laʼ, mi maʼ inqabʼan i inqaqʼor ne kikaqrik quukʼ. Inkikoj rehtaal chajarik inqabʼan atoobʼ ta reʼ hoj maʼ inqakoj ta rehtaal» (Nicole).
NAʼOJBʼAL REH I SANTO LAJ HUUJ: Reʼ naʼojbʼal inchalik ruukʼ i Dios, saq wach (Santiago 3:17).
¿CHAJARIK NE NABʼAN?
Chapahqaaj aweh: «¿Nikwʼach inuqʼoreej i wuchʼihiil eh taqeh nuhalakʼuun? ¿Chajarik inwil pan tele? ¿Ajwach taqeh wamigo? ¿Inukapaaj na taqeh tokoom?». ¿Inawaaj na chi reʼ taqeh ahalakʼuun ne inkitijej keh i nabʼan?
«Reʼ nubʼahiil eh reʼ hin, maʼ inqapahqaaj ta keh i qahalakʼuun chi ne inkinimaj jenoʼ kʼuhbʼaal, mi reʼ hoj maʼ inqanimaj ta» (Christine).
Chapahqaaj kuybʼal amahk. Reʼ taqeh halakʼun kehtʼal chi reʼ taqeh kituut kajaaw ajmahk taqeh. Ruum ajreʼ, mi reʼ hat inapahqaaj kuybʼal amahk reh awuchʼihiil eh taqeh ahalakʼuun noq inajotʼ awiibʼ, ne nakʼuhtaaj keh i holohik laj naʼojbʼal, jeʼ rukabʼ rubʼanariik i holohik chi juneliik eh i lochʼooj iibʼ.
«Koruman chi ne inqaqʼor chi xqajotʼ qiibʼ eh rupahqaljiik kuybʼaal qamahk, mi maʼ jeʼ reʼ xqabʼan reʼ taqeh qahalakʼuun maʼ ne ta inkitijej» (Robin).
«Reʼ hoj ajabʼees inqakʼam kibʼeeh taqeh qahalakʼuun. Reʼ keh qʼeʼ inkikoj rehtaal i inqabʼan. Jeʼ rukabʼ jenaj huuj tehlik paam, reʼ keh inkil i qanaʼojbʼal chuʼnchel i qʼiij» (Wendell).
