Pape ku mame ku sedu izemplu, ta vivi di akordu ku ki ke ta sina. Pur izemplu, bu ka pudi spera pa bu fiju sedu algin ku ta konta bardadi, ora ku algin bin jubiu, i bu ka misti papia ku el, bu falal: “Falal kuma N ka sta.”

“I kustuma ta faladu, ‘fasi ke ku N falau, ka bu fasi ke ku N ta fasi.’ Ma es manera di pensa ka ta funsiona ku mininus. Elis i suma spuma, e ta cupa tudu kusa ku no ta fala i ku no ta fasi, i e na kontanu ora ke nota kuma no ka ta fasi ke ku no ta sina elis.” — David.

PRINSIPIU DI BIBLIA: “Abo ku fala pa ka furta, bu na furta?” — Romanus 2:21.

Mininus te mesmu adolesentis mas ta kopia manera di sedu ku asons di se pape ku mame, di ki manera di sedu ku asons di kualker utru algin, nkluindu se kolegas. Es signifika kuma abo i minjor algin ku pudi orienta bu fijus na un bon kamiñu, bu na konsigi fasil si bu ta pratika ke ku bu ta sina elis.

“No pudi ripiti un kusa sen bias, i no pensa kuma no fiju obil, ma basta so no falia un bias na ke ku no fala i na kontanu el. Mininus ta presta atenson na tudu ku no ta fasi, mesmu si no pensa kuma e ka nota.” — Nicole.

PRINSIPIU DI BIBLIA: “Jiresa ku bin di riba, . . . i ka finjidu.” — Tiagu 3:17.

Analisa bu propi normas. Kal tipu di divirtimentu ku bu ta jubi? Kuma ku bu ta trata bu parseru ku bu fijus? Kal tipu di amigus ku bu tene? Sera ki bu ta pensa na utrus? Pa rusumi, sera ki bu sedu tipu di algin ku bu misti pa bu fiju sedu?

“Ami ku ña omi, no ka ta pui no fijus sigi normas ku anos propi no ka ta sigi.” — Christine.

Pidi diskulpa si bu yara. Bo fijus sibi ja kuma abos i ka perfeitu. Si bu ta fala “diskulpa” ora ku bu yara bu parseru o bu fijus, bu na da elis un bon lison di onestidadi ku umildadi.

“No fijus pirsisa di obinu na rukuñisi no erus, i e pirsisa di obinu na pidi diskulpa ora ku no yara, si ka sin e na aprindi so sugundi se erus.” — Robin.