Wazazi huweka kielelezo kwa kuishi kulingana na yale wanayofundisha. Kwa mfano, huwezi kutarajia mtoto wako awe msema kweli ikiwa amekusikia ukisema, “Mwambie sipo,” wakati ambapo hutaki kuongea na mgeni aliye mlangoni.

“Wazazi hawapaswi kutarajia watoto wafanye kile wanachowaambia ikiwa wao wenyewe wanatenda kinyume. Watoto hufyonza kila kitu tunachosema au kufanya, nao watatuambia ikiwa matendo yetu hayaendani na kile tunachowafundisha.”—David.

KANUNI YA BIBLIA: “Wewe unayehubiri, ‘Usiibe,’ je, wewe huiba?”​—Waroma 2:21.

Kielelezo cha wazazi kwa watoto wao na hata vijana kina nguvu sana kuliko maneno au matendo ya mtu mwingine yeyote, kutia ndani watoto au vijana wenzao. Hilo linamaanisha kwamba unachangia sehemu kubwa sana katika kuwaongoza watoto wako kwenye njia inayofaa, na bila shaka hiyo itawezekana ikiwa tu unatenda kulingana na yale unayofundisha.

“Huenda ukamwambia mtoto jambo fulani mara nyingi na usiwe na uhakika ikiwa kweli anakuelewa, lakini ukitenda kinyume na ulichosema hata mara moja tu, mtoto atakuambia. Watoto huona kila kitu tunachofanya, hata tunapohisi hawaelewi.”—Nicole.

KANUNI YA BIBLIA: “Hekima inayotoka juu . . . si ya kinafiki.”​—Yakobo 3:17.

Jichunguze. Wewe hutazama sinema au miziki ya aina gani? Unamtendeaje mwenzi wako na watoto wako? Rafiki zako ni watu wa aina gani? Je, unawajali wengine? Kwa ufupi, ukifikiria jinsi unavyotaka watoto wako wawe, je, hivyo ndivyo wewe ulivyo?

“Mimi na mume wangu hatuwalazimishi watoto wetu kuishi kupatana na kanuni ambazo sisi wenyewe hatufuati.”—Christine.

Omba msamaha unapokosea. Watoto wako wanajua kwamba wewe si mkamilifu. Ukikosea na kumwambia mwenzi wako na watoto “samahani,” utakuwa ukiwafundisha kuwa wanyoofu na wanyenyekevu—sifa muhimu sana maishani.

“Watoto wetu wanahitaji kusikia tukikubali makosa yetu na kuomba msamaha. Tusipofanya hivyo, hawatajifunza kukubali wanapokosea.”—Robin.