SBʼAJA NANTALIKI
8. Yajel ja sjejel
¿JAS WA STOJOLAN?
Yajel ja sjejel wani stojolan yuj jach wa xkʼulaxi soka jas wa xjexiʼi. Jun tatal mini oj smajlay bʼa tolabida oj yal ja smeranil ja yuntikil, ta wa xyabʼye wa xyala ke mi teyuk ja yajni ay maʼ wa xleji yuji sok mi xkʼan eluk.
«Jitsan kristyano wa xyala: ‹Kʼulan ja jas wa xkala sok mi jaʼuk ja jas wa xkʼulani›, pe mini xmakuni ja jaw soka untiki. Jachukeni jastal ja esponja bʼa wani xchʼak yiʼe ja jas wa xkalatiki sok ja jas wa xkʼulantiki. Ta wa xjeʼatikyile jun jasunuk sok pilan ja jas wa xkʼulantiki, ojni yaʼ sbʼaje kuenta sok ojni yal-e kabʼtik» (David).
RASON BʼA BIBLIA: «Ja weʼn bʼa wani xa cholo ‹Mok elkʼanan›, ¿jas yuj wala elkʼani?» (Romanos 2:21).
¿JAS YUJ JEL TʼILAN?
Ja nantatalik yeʼnleni mas wa xnebʼjiyi ja smodoʼe yuja yuntikile, mastoni ke yuja smoje eskuela, asta ja yajni wanexa solteroʼaxeli. Ja it wa stojolan ke weʼnlexni oja tojex mas lek jawa wuntikilex ja bʼa lekil bʼeji, pe jani ta wanex skʼulajel ja jas waxa jeʼawexi.
«Wani xbʼobʼ kaltik jun jasunuk jitsan ekʼele sok spensarajel ta wane smaklajel ja untiki, pe ta mini wanukotik skʼulajel ja jas wa xkalatiki, ojni yal-e kabʼtik lom wantik yaljel. Ja yeʼnleʼi altantoxtani aye ja bʼa jastik wa xkʼulantiki, ama ayni ekʼele mi jelukxta wa x-ilxi» (Nicole).
RASON BʼA BIBLIA: «Ja biboʼil bʼa satkʼinali [...] mi chabʼ karaʼuk» (Santiago 3:17).
¿JASA OJ BʼOBʼA KʼULUK?
Jobʼo abʼaj: «¿Jastal wa xkila ja jnup sok ja kuntikili? ¿Jastik wa xkʼela ja bʼa telebisyoni? ¿Jas tikʼe amigoʼik kiʼoj? ¿Wan maʼ xpensaraʼan sbʼaja tuk?». Bʼa tuk yaljel, ¿wan maʼ xa kʼana ke jawa wuntikil oj kʼotuke jastal weʼna?
«Ja keʼn sok ja jtatami mini wa xkʼanatikonyi ja kuntikiltikon a-skise jun rason bʼa mi xkisatikon ja keʼntikoni» (Christine).
Kʼana perdon. Ja untiki wani snaʼawe ke mulanume ja nantataliki. Ja yuj, ta ja weʼn waxa kʼanayi perdon jawa nup ma jawa wuntikil ja yajni ay jas mi lek waxa kʼulani, wanani sjejelyi sbʼaja yaljel ja smeranil sok ja yajel jbʼajtik chʼinili.
«Tʼilani oj kaltik ja jas mi lek wa xkʼulantik sok skʼanjel perdon, pes ta mi xkʼulantik, ja kuntikiltiki mini oj kʼajyuke skʼulajel» (Robin).
Ja nantataliki jelni xbʼobʼ jkoltaytike ja untiki. Jelni tʼilan ja jas wa xjeʼatikyile pes jani mas wa xyaʼa sate. Jachni kʼotel jastal jun libro bʼa tolabida jaman ay, jastal jun jasunuk bʼa snajtil kʼakʼu wa xjexi» (Wendell).
