KA VAPSWALI
Ya wu 8: Va vekele cikombiso
LEZVI ZVI WULAKO ZVONA
A vapswali lava va nga cikombiso ci nene va hanya hi lezvi va gondzisako. Hi cikombiso, u nga rindzeli ku a n’wana wa wena a wulawula lisine loku ku hi lezvaku wa tolovela ku loku kuta munhu laha kaya na u nga zvi lavi ku bhula naye uli: “Mu byele ku a ndzi kona.”
“A vanhu vo tala va tolovela ku wula ku: ‘Maha lezvi ndzi wulako, ku nga hi lezvi ndzi mahako.’ Kanilezvi a zvi tiri ka vanana. A vanana va fana ni zviphonja, va pimanyisa lezvi hi wulako ni lezvi hi mahako, niku a va chavi ku hi byela loku hi nga hanyi hi lezvi hi va gondzisako.” — David.
TSHINYA GA NAYO GA BHIBHILIYA: ‘Wena loyi u kanelako lezvaku ku nga yibyiwi, wa yiva ke?’ — Va Le Roma 2:21.
HIKUYINI ZVI NGA ZVA LISIMA?
A vanana ni vaswa va byekelela ku pimanyisa vapswali vabye a ku hundza vanhu van’wani — a ku patsa ni vanghana vabye. Lezvo zvi komba ku wena mupswali hi wena u nga ka ciyimo ci nene ca ku va gondzisa mahanyela ma nene a vana va wena. Loku u maha lezvo u tava u hanya hi lezvi u va gondzisako.
“Hi nga phindaphinda mhaka yo kari yi nga ngheni ka n’wana wa hina, kanilezvi loku hi tshuka hi phazama khati gin’we hi nga mahi lezvi hi wulako i tekela ku zvi pola. A vanana va veka kupima ka zvontlhe lezvi hi mahako hambu loku hina hi ti byela ku a va zvi woni.” — Nicole.
TSHINYA GA NAYO GA BHIBHILIYA: “A wutlhari legi gi tako hi le hehla, . . . a gi na . . . kuxengetela.” — Jakobe 3:17.
LEZVI U NGA MAHAKO
Hlola mahanyela ya wena. Xana u randza ku sixtira yini? Wa hanyisana khwatsi ni nuna wa wena kutani sati ni vana va wena? Hi vamani u hlakano navo? Wa khatala hi van’wani? Xana u munhu loyi zvi ringanako ku pimanyisiwa hi vana va wena?
“Mina ni nuna wa mina a hi lavi ku a vana va hina va hanya hi zvo hambana ni lezvi hi hanyisako zvona.” — Christine.
Loku u maha zvihoxo kombela ku tsetselelwa. A vana va wena va zvi tiva ku a wu mbhelelangi. Loku u kombela ku tsetselelwa hi nuna wa wena kutani sati wa wena ni vana va wena, u ta veka cikombiso ci nene ca ku tsumbeka ni ku ti koramisa.
“A vana va hina va fanele ku hizwa na hi vhumela zvihoxo zva hina ni ku kombela ku tsetselelwa. Loku hi nga mahi lezvo va ta gondza ku fihla zvihoxo zvabye.” — Robin.
“Kota vapswali, a vana va byekelela ku hi pimanyisa niku hi va gondzisa nguvhu hi cikombiso ca hina hakuva contlhe cikhati va zvi wona lezvi hi mahako. Contlhe cikhati a mahanyela ya hina ma va gondzisa cokari.” — Wendell.
