Abereki anodikana kuita zvaanofundisa ana awo. Ngo muezaniso, kana munhu akauya pa nyumba imwimwi mobvunza mwana wenyu kuti “mubvunze kuti andiripopi pa nyumba,” musazoetsere kuti iyena arekete cokwadi.

“Anhu akawanda anoti ‘Ita zvandinoreketa, asi usaite zvandinoita’. Asi izvona azviseenzi ku ana adoko. Ngekuti akaita hingana esponja, awona anoita zvese zvatinoreketa no zvatinoita uye anotibvunza kana tisikaiti zvatinoafundisa.”—David.

ZVINOBHUYA BHAIBHERI: “Iwewe, unoparidzira kuti, ‘Usabe,’ iwewe aubi here?”—Aroma 2:21.

Ana anonyanya kuteedzera zviro zvaanoona zveciizwa no abereki awo. Izvi zvinoreya kuti ndimwi munotodikana kubetsera ana enyu kuti aite zviro zvakanaka, asi kana meciitawo zvamunoafundisa.

“Tingakwanisa kurumbwa tecibvunza mwana ciro cimwe-cimweco tisikazii kuti uri kupurutana here, asi patinozokonerhwa kuita ciro icona, iyena unozozvibhuya. Ana anoona zvese zvatinoita, kunyazi paya patinonga tecirangarira kuti aaripi kuzviona.”—Nicole.

ZVINOBHUYA BHAIBHERI: “Ungwaru unobva kumusoro . . . aucengedzi.”—Tiyago 3:17.

Ongororai miitiro yenyu. Munodikana kuona zviro zvakaita kudini mu terevhizori? Munogarisana zvakanaka here no wamakawakana naye uye no ana enyu? Munoshamwaridzana no anhu akaita kudini? Munozwira amweni usisi here? Munoita zvamunoda kuti ana enyu aite here?

“Inini no mwamuna wangu atibvunzi ana edu kuti aite zviro zvatisikaiti.”—Christine.

Kumbirai rurekerero pamunoshaisha. Kumbirai rurekerero kana mashaisha. Ana enyu anotoziya kuti munoshaisha. Kubvunza wamakawakana naye uye ana enyu kuti: “Ndashaisha” zvicaita kuti afunde kugara anhu akagondeka uye anodzidodosa.

“Ana edu ngaazwewo tecitendera kuti tashaisha uye tecikumbira rurekerero. Kana tikasama kudaro, aazotendiwo paanonga ashaisha.”—Robin.