Emiọvwọn ri phiẹ udje phiyotọ yeren akpọ nene obo rẹ ayen yono. Kerẹ udje, ọ cha bẹn wọ vwọ rhẹro rọyen nẹ ọmọ wẹn cha dia ohwo rọ ta uyota, siẹrẹ o de nyo we ru vwọ ta vwẹ ọke wọ rha guọnọ ta ota kẹ ohwo ọvo ro bru uwe rhe-e, “Vuẹ nẹ me hẹ uwevwi-in.”

“Ota ọvo rẹ ihwo ta yen, ‘Ru obo re me tare, ọ dia obo ri mi ruẹ-ẹ.’ Ẹkẹvuọvo, ọ dia ọtiọyen yen ọ hepha vwọ kẹ emọ-ọ. Emọ pha kerẹ ahworhẹ, kemu kemu rẹ avwanre ta yẹrẹ ruẹ yen ayen vwẹrokerẹ, ayen je cha vuẹ avwanre siẹrẹ uruemu rẹ avwanre rhe shephiyọ vẹ oborẹ avwanre yono aye-en.”—David.

UCHEBRO RI BAIBOL: “Wẹ ro ghwoghwo nẹ e cho uji-i, ku wọ rhoma cho uji?”—Rom 2:21.

Uruemu rẹ ọsẹ vẹ oni yen imitete vẹ ighene ma vwẹrokere vrẹ ọ rẹ igbeyan vẹ ihwo efa. Kọyen ọsẹ vẹ oni yen vwo oghwa rẹ ayen vwọ vwẹrote emọ rayen vwẹ idjerhe ro me yovwin; ọtiọyena, ofori nẹ esẹ vẹ ini ru nene oborẹ rayen ta na.

“Avwanre sa vwariẹn orọnvwọn ọvo abọ buebun vẹ ẹwẹn nẹ ọmọ rẹ avwanre kerhọ-ọ, ẹkẹvuọvo ọke rẹ avwanre rhe ru nene oborẹ avwanre tare-e, ọke yena yen ọmọ na cha vwọ reyọ vwọphia. Kemu kemu rẹ avwanre ruẹ yen emọ kerhọ vwọ kẹ, ọ da tobọ dianẹ avwanre roro nẹ ayen kerhọ-ọ.”—Nicole.

UCHEBRO RI BAIBOL: “Aghwanre ro nẹ obenu rhe . . . phiẹn oma rọye-e.”—Jems 3:17.

Frẹkotọ fuẹrẹn iwan romobọ wẹn. Oka rẹ ughe vọ yen wo nẹ? Mavọ yen wo nene ọrivẹ rẹ orọnvwe wẹn vẹ emọ wẹn yerẹn wan? Oka rẹ igbeyan vọ yen wo vwori? Wo roro kẹ ihwo efa? Ọtiọyena, wọ guọnọre nẹ emọ wẹn dia oka rẹ ohwo re wọ hepha na?

“Mẹ vẹ ọshare mẹ si ufi vwọ kẹ emọ rẹ avwanre nẹ ayen yerin nene iwan rẹ avwanre komobọ sa tobọ ruẹ nene-e.”—Christine.

Yovwunu fikirẹ ichobọ wẹn. Emọ wẹn riẹnre nẹ wọ gbare-e. Vwẹ ọke ro de fo, wọ da vuẹ ọrivẹ orọnvwe wẹn yẹrẹ emọ wẹn nẹ “wọ ghwọ-ọ,” kọyen wo phi omamọ rẹ udje rẹ evun-ẹfuọn vẹ omaevwokpotọ phiyotọ.

“Ofori nẹ emọ rẹ avwanre nyo ọke rẹ avwanre da rhọnvwe oruchọ avwanre vẹ ọke re de yovwunu fikirẹ oruchọ avwanre. E rhe ru ọtiọye-en, ọ cha nẹrhẹ ayen rhuru oruchọ rayen.”—Robin.