Ẽbẽra bʉa ĩjãbʉra iyara ũrĩbʉ iyaʼa zokʼapanʉra, obʉ iya oya adara akʉza ewari jõmaʉ̃nẽ wãrĩnuta jarabʉ. Maʉ̃ta opanʉbʉrʉ yibariraba, yi neũdukʼawuaraba akʉza yi nokʼoraba ĩjãnañi.

Nãã ĩjãbibara bʉde, bʉa okĩrãbʉ oira.

«Bʉ yibariraba bʉde ĩjãira ũdubibara bʉara daucha obʉta, maʉ̃ta bari oũdubi ẽ ãyibawarabʉde awuarabʉrʉ bʉ dobabʉdebida oibara» (Sarahi).

DAIZEZE BEDʼEABA JARABɄTA: «Ũdubidua mara jʉ̃zababʉta» (2 Corintios 13:5).

Naʉ̃ra ũrãgʼaba kʼarebayi bʉ yibariraba bʉde audre ĩjãmarẽã.

Wãrĩnuta jarada. Bʉa wãrĩnuta jarabʉ ẽ bʉrʉ ẽbẽrarãbara bʉ ʉ̃rʉra ĩjãna ẽ bayi. Mamina bʉa wãrĩnuta jarabʉbʉrʉ, nemitia obʉrʉdera, ẽbẽrarãba ĩjãnañi bʉ ʉ̃rʉra.

«Bʉmara zare ẽ wãrĩnu jaraita bʉmabʉta jarakĩrãbʉbʉrʉ, mamina bʉ bedʼea zroma ũdubʉrʉde bʉa mama wãrĩnuta jarabʉbʉrʉ, maʉ̃ba ẽbẽrarãbara ĩjãseabʉ bʉ ʉ̃rʉ» (Caiman).

DAIZEZE BEDʼEABA JARABɄTA: «Jõma daiba opanʉra bia okĩrãpanʉ» (Hebreos 13:18).

Ora bʉa omarẽã jaradapeadara. Estados Unidosdera 78 % ẽbẽrarã awuru ẽbẽrarã jʉrʉbʉ kʼãrẽ trajo oita, maʉ̃ra widisida ẽbẽrarãba kʼãrẽta nesidabʉta trajo erbaita, ãya jarasi «bedʼea ũbeadebemata audre yibiata oita daya omarẽã jaradapeadata». Bʉa jaradapeadata kʼawuaena obʉbʉrʉ kʼarebayi ʉ̃ra zeidebida.

«Mʉ̃a ora jarada ʉ̃rʉ jarada ẽã mʉ̃ yibariraba maʉ̃ra akʉbʉ. Ãyara audre ĩjãbʉ mʉ̃ ʉ̃rʉ, mʉ̃a jaradapeadata mʉ̃a ora» (Sarah).

DAIZEZE BEDʼEABA JARABɄTA: «Mʉ̃a wãrĩnu ĩjãbʉ bʉa naʉ̃ra wãrĩnu oita», «kʼawuabʉ baera bʉara mʉ̃a jarada audre oita» (Filemón 21, nota).

Jʉ̃ãbara. Daya ũduseabʉ ẽbẽra wari wãra, mamina maʉ̃ ẽbẽra sode edabʉ kʼãrẽ kʼawuaira ewari mejãcha edebʉ.

«Bʉara oẽ bʉ yibariraba mawũã ẽ bʉrʉ awuru ẽbẽrarãba bʉ ʉ̃rʉ waña ĩjãmarẽã, mamina bʉa obʉbʉrʉ bʉa zokʼapanʉta, mawũãra wiña wiñane audre ĩjãnañi bʉ ʉ̃rʉ» (Brandon).

DAIZEZE BEDʼEABA JARABɄTA: «Jʉ̃ãbara» (Colosenses 3:12).