CHAʼAN JIÑI XCOLELOB
10. Pʌsʌ chaʼan mejlʌch i chʼʌmetob ti ñuc
¿CHUQUI YOM I YɅL?
Chaʼan mi lac chʼʌjmel ti ñuc yom mi laj qʼuel ti ñuc jiñi mandar tac, yom mi lac tsʼʌctesan lac tʼan i tiʼ pejtelel ora yom mi lac sub chuqui i sujm. Cheʼ bajcheʼ jiñi, wen mi caj i qʼueloñobla lac tat lac ñaʼ, jiñi la camigojob yicʼot lac yum ti eʼtel.
¿CHUCOCH ÑUC I CʼɅJÑIBAL?
Chaʼan maʼ ñumen ajqʼuel ti libre, lʌcʼʌ tiʼ pejtelel ora yom maʼ pʌs chaʼan mejlʌch i ñopob a tʼan.
«Chaʼan jiñi a tat a ñaʼ miʼ chʼʌmetob ti ñuc yom wen jach bajcheʼ yilalet tiʼ pejtelel ora, mach cojach cheʼ bʌ yaʼan a wicʼotob» (Sarahi).
PRINCIPIO AM BɅ TI BIBLIA: «Chʌn qʼuelela majquiyetla tiʼ sujm» (2 Corintios 13:5).
¿CHUQUI MIʼ MEJLEL A MEL?
Ili ticʼojel tac mi caj i coltañet chaʼan miʼ chaʼ chʼʌmetob ti ñuc jiñi a papá a mamá o chaʼan miʼ ñumen chʼʌmetob ti ñuc.
Alʌ chuqui i sujm. Mi tsaʼ chaʼle lot orajach maʼañix mi caj i ñopob a tʼan. Pero mi mucʼʌch a wʌl chuqui i sujm yicʼot maʼ mel chuqui utsʼat, cheʼto jaʼel cheʼ bʌ maʼ ñajʌyel, jiñi yambʌlob mi caj i chʼʌmetob ti ñuc.
«Mach wocolic mi la cubin chaʼan mi la cʌl chuqui i sujm cheʼ bʌ miʼ coltañonla, pero mi mucʼʌch la cʌl chuqui i sujm cheʼ la cujil chaʼan miʼ mejlel i ticʼlañonla mi caj i coltañonla chaʼan miʼ ñumen chʼʌmoñobla ti ñuc» (Simón).
PRINCIPIO AM BɅ TI BIBLIA: «Comʌch lon c mel chuqui utsʼat tiʼ pejtelel chuqui mi lon c mel» (Hebreos 13:18).
Mele chuqui maʼ subentel. Ti jumpʼejl encuesta tsaʼ bʌ mejli ti Estados Unidos, ñumen ti ojlil tsiʼ yʌlʌyob chaʼan ñuc i cʼʌjñibal cheʼ bʌ mucʼʌch lac tsʼʌctesan jiñi muʼ bʌ lac subentel chaʼan miʼ mejlel lac taj la queʼtel. Mi mucʼʌch a mel chuqui maʼ subentel ili ora, mi caj i coltañet cheʼ baʼ ora ñuquetix.
«Jiñi c papá yicʼot c mamá mucʼʌch i qʼuelob cheʼ bʌ orajach mic jacʼbeñob i tʼan i cheʼ mach cʼʌñʌlic miʼ putun subeñoñob. Cheʼ bʌ mucʼʌch c mel chuqui miʼ subeñoñob miʼ ñumen chʼʌmoñob ti ñuc» (Sarah).
PRINCIPIO AM BɅ TI BIBLIA: «Cujil chaʼan mucʼʌch caj a jacʼbeñon, [...] cujilix ñumento mi caj a mel cheʼ bajcheʼ woli c subeñet» (Filemón 21).
Yom a wujil pijt. Orajach mi lac taj laj qʼuel cheʼ bʌ juntiquil lac piʼʌl tsaʼix qʼuextʌyi i ñiʼ i wut, pero mach orajic miʼ cʼotel laj cʌn mi tsaʼix i taja i ñaʼtʌbal.
«Mach orajic miʼ mejlel a mel chaʼan jiñi a papá a mamá miʼ chʼʌmetob ti ñuc, pero mi tiʼ pejtelel ora mucʼʌch a mel chuqui miʼ subeñetob mi caj i ñumen chʼʌmetob ti ñuc» (Brandon).
PRINCIPIO AM BɅ TI BIBLIA: «Pʌsʌla laʼ pijt» (Colosenses 3:12).
