YOVADINKANTU
10: Kukuhuguvara
EYI AYI TANTA
Vantu wokuhuguvara kuninkisa vakondi vawo novakwawo ntani novahona vawo va va huguvare unene. Awo kulimburukwa konoveta nokusikisa mo matumbwidiro gawo ntani kuuyunga usili nkenye apa.
EYI YA KARERA NOMULYO
Umanguruki ou no gwana kwa korera omu va kuhuguvara.
Sarahi kwa tanta asi: “Mokuninka asi vakondi woge va ku huguvare wa hepa kuyilikida asi ono kuru panandunge ntani wa kara nosinka, kapisi paapa tupu ava kara po nye nampili awo pwato.”
MPANGO ZOMOBIBELI: “Kukura koge va ku mone navenye.”—1 Timoteusa 4:15.
EYI NO RUGANA
Nsene asi ono hara va ku huguvare unene ndi o tengwidire po ehuguvaro eli wa zumbanesere, nonkedi edi dina kukwama ko kuvhura di ku vatere.
Hungika. Nsene ove kutanta yipempa kuninkisa vantu va dire kukuhuguvara. Ano nsene ove kuhungika ntani kapi o horeke mapuko goge, kuninkisa vakweni va ku huguvare.
Caiman kwa tanta asi: “Ayo ureru kuhungika nsene yininke kuna kukugenda po nawa. Nsene o hungika moyininke eyi nayi kumonekesa asi ove muntu gomudona, vantu ngava kuhuguvara unene.”
MPANGO ZOMOBIBELI: “Ose kwa hara kuhungika mwanayinye.”—Vahebeli 13:18.
Sikisa mo yitumbukira yoge. Ekonakono limwe va rugene moAmerika, kwa likidire asi sinzi sava ava kutu varugani awo kukuta vantu ava ava sikisa mo yirugana yawo. Kulironga kusikisa mo yitumbukira yoge ngesi, ngayi kuvatera apa ngo kura.
Sarah kwa tanta asi: “Vakondi vange kuyidimburura apa ani sikisa mo yitumbukira yange nokurugana yirugana yange va hana kudiworokesa nge. Moomu nina kulitura mo unene, yimo nayi va ninkisa va huguvare nge unene.”
MPANGO ZOMOBIBELI: “Ame kwa ku huguvara asi ove kuzuvha, . . . na diva asi ove ngo pitakanesa kurugana pweyi nina kukutantera.”—Firemoni 21.
Lididimikira. Vantu ureru kudimburura omu vadinkantu vana kukura parutu, nye udigu kudimburura omu vana kukura panandunge. Eyi yiyo vadinkantu va hepera kulididimikira.”
Brandon kwa tanta asi: “Ayo kugusa siruwo nelituromo komeho vakondi novakweni va ku huguvare. Nye nsene o twikira kusikisa mo yitumbukira yoge mwaza siruwo ngava ya ku huguvara.”
MPANGO ZOMOBIBELI: “Omu didimikire navenye.”—1 Vatesaronika 5:14.
