Awana bebundwanga e vuvu belemvokelanga e nsiku, belungisanga e nsilu miau ye bevovanga ludi ntangwa zawonso. Muna kuma kiaki, bebundwanga e vuvu kwa mase mau, akundi ye kwa mfumu zau za salu.

Nkumbu miayingi, vava osonganga vo wafwana bundw’e vuvu, luvevoko lwayingi mpe otambula.

“E mpila yambote olenda songela vo wafwana bundw’e vuvu kwa mase maku i mu songanga vo u muntu wazikuka ye ovangilanga o mambu kuna ngangu kana nkutu vava mase maku ke bena lukufi ko.”—Sarahi.

DINA BIBILA KIVOVANGA: “Nuvavanga zaya e mpila muntu lwina.”—2 Korinto 13:5.

Avo ozolele vo o wantu babunda diaka e vuvu yovo vutukila kubunda e vuvu, o mambu malende malenda kusadisa.

Kala nkwa ziku. Diasazu kwa wantu mu yambula bunda e vuvu kwa akwau avo fu kia vuna bena kiau. Kansi, avo osongele vo u nkwa ziku musungula vava ovanganga vilwa, o wantu bekubunda e vuvu.

“Diasazu mu kala nkwa ziku vava o mambu mekalanga mambote. Kansi, dilenda kala diampasi avo ovangidi e diambu diyivisi e nkumbu aku. Avo ovovele e ludi, difila o wantu mu kubunda e vuvu.”—Caiman.

DINA BIBILA KIVOVANGA: “Tuzolele kala akwa ziku muna mambu mawonso.”—Ayibere 13:18.

Toma lungisanga e iyekwa yaku. Lufimpu lumosi kuna Estados Unidos lwavova vo wantu ayingi ana besadilanga muna makompani bevovanga vo ozaya toma lungisa e iyekwa i kimosi muna fu tatu ivavuanga kwa asadi ampa. Vava okituka mbuta obakula vo diambote wau walongoka toma lungisa e iyekwa yaku tuka muna kileke.

“Mase mame bebakulanga vava itoma lungisanga e iyekwa yame muna nzo lembi teka voveswa ntangwa zawonso. Vava ivanganga mawonso muna toma lungisa e iyekwa yame, ediadi difilanga mase mame mu kumbunda e vuvu.”—Sarah.

DINA BIBILA KIVOVANGA: “Ngina ye vuvu ovanga dina ilombele, . . . wau nzeye wo vo oluta vanga dina mpovele.”—Filemone 21.

Kala yo luzindalalu. Ayingi bebakulanga vava o nleke kekolanga yo kula. Kansi, nkumbu miayingi ntangwa iviokanga mu bakula vo ozikukidi muna ngindu.

“Mase maku kumosi ye akaka ke bekubunda vuvu ko wau vo nkumbu mosi kaka ovangidi e diambu mu mpila yambote. Kansi avo okwamanene wo vanga, malembe-malembe bekubund’e vuvu.”—Brandon.

DINA BIBILA KIVOVANGA: “Nuvuata . . . luzindalalu.”—Kolosai 3:12.