Shu g’aˇ va g’a ve chaw hpehꞈ ve lehˬ, awˬ pa awˬ e, awˬ chawˇ, leh paw leˬ nawˬ htaꞈ yonˍ g’a ve yoˬ. Chi hk’e ve chaw lehˬ, awˬ liˇ teh taˍ ve leh ka tiꞈ te taˍ ve htaꞈ g’aꞈ te ve, leh hk’aˬ htaˆ kaꞈ awˬ tehˬ ve tawˇ yaw ve yoˬ.

Maˇ-awˍ ve k’o, shu nawˬ htaꞈ g’aˇ va g’a tuˬ ponˬ laˬ htaˇ nawˬ hk’aˬ hk’e te ve htaꞈ cawˬ ve yoˬ.

“Nawˬ htaꞈ awˬ pa awˬ e g’aˇ va g’a tuˬ daꞈ jaˇ ve awˬ hk’aˇ lehˬ, yawˇ hui chehˇ htaˇ maˇ k’oˆ, maˇ chehˇ htaˇ maˇ k’oˆ, nawˬ chaw mawˇ hpehꞈ-oˬ leh nawˬ ve awˬ vuiˬ htaꞈ a yeˇ yuˬ ve tehꞈ hpeuꞈ maw piˇ ve yoˬ.”—She-lin.

LIꞈ HPU HK’AW BEˆ MAˍ LAˇ TAˍ VE: “A shu yawˇ awˬ to htaꞈ hk’a dehꞈ tehˆ nyi lawˇ nyi sheˍ.”—2 Kawˇrenˍhtuˆ 13:5.

Shu nawˬ htaꞈ hk’a dehꞈ yonˍ g’a tuˬ maˇ heˆ leh yawˇ hui nawˬ htaꞈ awˉ lawˉ htaˇ hk’e g’aˇ k’awꞈ va tuˬ, awˬ hawˉ lo cawˬ ve awˬ ceuˬ teˇ hpaˍ nawˬ htaꞈ ga laˇ g’a ve yoˬ.

Ka tiꞈ yeˬ ve chaw hpehꞈ ve. Nawˬ shu htaꞈ heˍ piˇ ve k’o, shu nawˬ htaꞈ g’aˇ maˇ k’awꞈ va-o. Yaꞈ hk’aˇ, nawˬ te yaꞈ htaˇ maˇ faˉ ve k’o, shu nawˬ htaꞈ yonˍ g’a tuˬ te piˇ ve yoˬ.

“Ka tiꞈ yeˬ ve lehˬ ngaˬ hui htaꞈ shoꞈ shaꞈ tuˬ maˇ te laˇ ve k’o, sha ve yoˬ. Yaꞈ hk’aˇ, ngaˬ hui htaꞈ shoꞈ shaꞈ tuˬ te laˇ ve k’o, ka tiꞈ yeˬ tuˬ haˍ ve yoˬ. Nawˬ coˇ caˇ leh chi hk’e te ve k’o, awˬ nu ve chaw kaꞈ nawˬ htaꞈ g’aˇ va tuˬ yoˬ.”—Hkai-meh.

LIꞈ HPU HK’AW BEˆ MAˍ LAˇ TAˍ VE: “Teˇ ceuˬ le le awˬ hk’aw lo ngaˬ hui ka tiꞈ g’a yeˬ ve yoˬ.”—Heˍbrehˇ 13:18.

Awˬ vuiˬ htaꞈ a yeˇ yuˬ puiˉ ve. Aˍmeˬriˆkaꞈ mvuhˇ miˬ hk’aw kanˉ te ve htaꞈ caˉ daꞈ ve chaˬ nyi tehˆ nyi ve chaw 78 pun k’oˆ ve, ‘chaw yaˇ htaꞈ kanˉ te tcuh la tuˬ te hk’aˇ dawˇ hk’aˇ a yeˇ uiˍ jaˇ ve 3 ceuˬ hk’aw teˇ ceuˬ lehˬ awˬ vuiˉ htaꞈ a yeˇ yuˬ puiˉ ve yoˬ.’ Chi teˇ hkui kaꞈ awˬ vuiˬ htaꞈ a yeˇ yuˬ puiˉ tuˬ te jaw ve lehˬ, awˬ g’uˇ suhˍ hpawˇ nawˬ uiˍ la htaˇ nawˬ awˬ pon awˬ bon cawˬ tuˬ yoˬ.

“Ngaˬ aˉ hk’aw lo kanˉ te tuˬ ngaˬ pa ngaˬ e hk’aˬ htaˆ kaꞈ maˇ g’a k’oˆ laˇ ve pa taw, ngaˬ awˬ vuiˬ htaꞈ a yeˇ yuˬ ve tehꞈ yawˇ hui mawˬ ve yoˬ. Ngaˬ awˬ vuiˬ htaꞈ a yeˇ yuˬ puiˉ ve tehꞈ yawˇ hui mawˬ tuˬ te piˇ htaˇ, ngaˬ pa ngaˬ e ngaˬ htaꞈ yonˍ g’a ve yoˬ.”—Saˍraˇ.

LIꞈ HPU HK’AW BEˆ MAˍ LAˇ TAˍ VE: ‘Nawˬ ngaˬ ve tawˇ hkawˇ htaꞈ na yuˬ tuˬ yoˬ tehꞈ ngaˬ yonˍ leh, ngaˬ nawˬ htaꞈ k’oˆ laˇ ve aꞈ kehˉ kaꞈ nawˬ te tuˬ yoˬ tehꞈ ngaˬ shiˍ ve yoˬ.’—Hpiˇleˍmonˍ 21.

Yeunˇ hkanˍ puiˉ ve chaw hpehꞈ ve. Dawˇ hk’aˇ hpawˇ leh jaw ve hpawˇ uiˍ la ve lehˬ, awˬ to hpawˇ uiˍ la ve htaꞈ peun daꞈ ve yoˬ. Awˬ lawn k’o, shu mawˬ maˇ g’a ve awˬ ceuˬ hpehꞈ leh awˬ yanˇ g’a yehˇ ve yoˬ. Chi htaꞈ pa taw, nawˬ yeunˇ hkanˍ puiˉ ve g’a cawˬ ve yoˬ.

“Nawˬ awˬ vuiˬ htaꞈ teˇ pawˆ ceh tiˉ a yeˇ yuˬ leh nawˬ pa nawˬ e leh awˬ nu ve chaw nawˬ htaꞈ g’aˇ va tuˬ te laˇ maˇ g’a. Yaꞈ hk’aˇ, nawˬ htaꞈ shu g’aˇ va g’a tuˬ hk’aˬ htaˆ kaˬ te cawˇ ve yoˬ.”—Beh˗dawˇ.

LIꞈ HPU HK’AW BEˆ MAˍ LAˇ TAˍ VE: ‘Nawˬ nyi ma dawˇ tzuhˍ g’aˇ tzuhˍ ve htaꞈ veuꞈ deh-oˬ.’—Kawˇlawˇsehˇ 3:12.