VAKUENDZE NA VAHUMBE
10: Muntu u va Hasa ku Kulahela
VI CA LOMBOLOKA
Vantu va ve ku kulahela, ve ku ononoka masiko, ku puisamo vi va likuminia kaha ve ku handeka vusunga ntsimbu yose. Kaha evi vie ku lingisa visemi, vavusamba kaha na vakuluntu vavo ha vipanga va va kulahele.
SEHO YA KALAHO
Nga mu muesa ngecize mua pua muntu u va hasa ku tsiliela, vakuenu va ka mi kulahela. Kaha eci ci ka mi kuasa ku livua ku zituka.
“Nga mu tonda visemi veni va mi kulahele, ntsimbu yose puenu na ku va muesa ngecize mua kala na mana kaha mue ku puisamo nkuminio yenu ambe nga ka muesi ha hiehi navo.”—Sarahi.
CITUME CA MU MBIMBILIYA: “Linga ku-suena cove ci soloke kuli vose.” —1 Timoteo 4:15.
VI MU HASA KU LINGA
Nga mu tonda linga vantu va mi kulahele ni va mi kulahele lueka, vimamuna vi na hatako vi hasa ku mi kuasa.
Puenu vakua vusunga. Vantu va ka mi kulahela nga mu pua vakua vusunga, cikumakuma nga mua sevuka. Vunoni nga mu pua na ku va kuisa, va ka likela ku mi kulahela.
“Ca pua ca casi ku pua mukua vusunga nga viose vili na kuenda vuino. Vunoni ku pua mukua vusunga nga mu na lingi vimo vi hasa ku vihisa lizina lienu, ci hasa ku kuata mua kama ku vakuenu nga va ka tualelelaho ku mi kulahela ni kuahi.”—Caiman.
CITUME CA MU MBIMBILIYA: “Tu hianga ku yoya na vusunga mu viuma viose.”—VaHevelu 13:18.
Ku puisamo nkuminio yenu. Cimo ku tondesesa ci va lingile ku Estados Unidos na vantu ve ku tonda vakua ku panga, cingi cavo va handekele nguavo: “Cimo ca vifua ca seho ya kama ha kati ka vifua vitatu vi tua tonda kuli vakua ku panga, ca pua, ku puisamo nkuminio.” Mua vusunga mu mu ka kola, mu ka litavela nguenu kali-kali nja puile mukua ku puisamo nkuminio tunde ku vukuendze.
“Visemi vange ve ku monako mu nje ku puisamo nkuminio yange. Kaha nje ku lihakela kapandi ka ku puisamo vipanga viange via ha ndzivo ca ku nona ku nji suamangeya. Evi vie ku lingisa visemi vange ku nji tsiliela mua kama.”—Sarah.
CITUME CA MU MBIMBILIYA: “Omo nja tsiliela ku-tamunuka cove, nja tantekeya ngecize ove u ka pulakana evi vi nji ku handeka.”—Filemone 21.
Kalenu na lukakatela. Vantu vose ve ku monako nga muntu ali na ku kola ku muvila. Vunoni ce ku ambata ntsimbu, linga vantu va nongonone ngecize muntu uaco nahi mu visinganieka.
“Visemi venu ka va ka mi kulahela lika muomu mu na puisamo nkuminio yenu lumo lika. Vunoni omo mu pua na ku puisamo nkuminio yenu mu ntsimbu ya kama, visemi venu na vantu veka va ka mi kulahela.”—Brandon
CITUME CA MU MBIMBILIYA: “Puenu vakua . . . lukakatela.”—Kolose 3:12. Litavasiano lia Liha.
