SHOKA TASHI KWATHELE AAGUNDJUKA
10: Okukala omwiinekelwa
OKUKALA OMWIINEKELWA OSHIKE?
Omuntu omwiinekelwa oha kala i inekelwa kaavali ye, kookuume ke nokomuhona gwe. Oha vulika koompango, oha gwanitha po omauvaneko ge noha popi aluhe oshili.
OMOLWASHIKE OKUKALA OMWIINEKELWA KWA SIMANA?
Olundji aavali ohaya gandja emanguluko shi ikolelela kwaashoka wa ninga momukokomoko gwethimbo, opo wu ulike kutya owu shi okwiinekelwa.
Meme Sarahi okwa ti: “Omukalo dhingi okuningitha aavali yoye ya kale ye ku inekela, oku ya ulukila kutya owa koka noho gwanitha po iinakugwanithwa mbyoka wa pewa. Iho shi ningi owala uuna ye li po, ihe nuuna kaaye po.”
SHOKA OMBIIMBELI TAYI TI: “Ikonakoneni, ne mu iyeleke.” — 2 Aakorinto 13:5.
SHOKA TO VULU OKUNINGA
Iinima tayi landula otayi vulu oku ku kwathela wu kale omwiinekelwa.
Kala omunashili. Ngele oho fundju, aantu itaye ke ku inekela we. Ihe ngele oho popi oshili noiho holeke omapuko goye, yalwe otaya ka kala ye ku inekela.
Omumati gwedhina Caiman okwa ti: “Ohashi kala oshipu okupopya oshili uuna inoo ninga epuko. Ihe ngele owa popi oshili nuuna wa ninga epuko, aantu otaya ka kala ye ku inekela.”
SHOKA OMBIIMBELI TAYI TI: “Otwa hala aluhe okulonga shoka shi li mondjila.” — Aahebeli 13:18.
Kala omwiinekelwa. Omapekapeko gamwe ngoka ga ningwa moAmerika otagu ulike kutya “okukala omwiinekelwa owo uukwatya wa simana mboka oongeshefa hadhi tala kuwo, opo dhi kute omuntu.” Okukala omwiinekelwa manga omushona otaku ke ku kwathela nuuna wa koko.
Sarah okwa ti: “Aavali yandje ohaye shi mono uuna nda gwanitha po iitegelelwa yandje nonda longa iilonga megumbo ngame mwene, inaaya dhimbulukitha ndje. Ohaya kala yi inekela ndje shi vulithe nale, oshikando kehe tandi shi ningi.”
SHOKA OMBIIMBELI TAYI TI: ‘Ondi inekela kutya oto ka ninga shoka tandi ku indile, nonda tseya kutya oto ka ninga oshindji shi vulithe mpoka.’ — Filemon 21.
Kala omwiidhidhimiki. Oshipu okumona omuntu sho ta koko, ihe ohashi pula ethimbo, opo wu mone ngele okwa koka moondunge noha vulu ngaa okugwanitha po iilonga ye.
Omumati gwedhina Brandon okwa ti: “Aavali yoye nayalwe ihaya thikile owala ye ku inekela, omolwoshinima shimwe shoka wa longa. Owa pumbwa okulonga nuudhiginini ethimbo nuule, opo ya kale ye ku inekela.”
SHOKA OMBIIMBELI TAYI TI: ‘Kaleni mu na eidhidhimiko.’ — Aakolossa 3:12.
