MA E TAU FUATA
10: Falanaki Lahi
KO E KAKANO
Ko e tau tagata ne falanaki lahi kua mauokafua e tau matua, tau kapitiga, mo e tau takitaki gahua ki ai. Omaoma a lautolu ke he tau matafakatufono, fakamooli e tau maveheaga, mo e talahau tumau e tala mooli.
KAKANO NE AOGA
Laulahi he tau tuaga, ko e lahi he atāina haau ne moua kua matutaki hako ke he falanaki ne fai magaaho kua taute e koe.
“Ko e puhala mitaki lahi ke falanaki e tau matua ki a koe, ko e fakakite kua motua mo e fakamooli he nakai ni ka haia a koe mo lautolu ka e pihia foki ka nakai ha ha i ai a lautolu.”—Sarahi.
MATAPATU FAKAAKOAGA HE TOHI TAPU: “Kia kumikumi hifo a mutolu kia mutolu.”—2 Korinito 13:5.
MENA KE TAUTE E KOE
He manako a koe ke moua e falanaki po ke liu moua e falanaki ne galo, to lagomatai he tau lakaaga ka mui mai.
Kia fakamooli. Mafiti e tau tagata ke nakai falanaki ki a koe ka pikopiko a koe. Ka atāina a koe ke talahau e mena mooli, mua atu ka taute e koe e tau hehē, to maeke e falu ke falanaki ki a koe.
“Mukamuka ke fakamooli ka holo mitaki e moui. Ka fakamooli a koe ke he taha mena ne kelea ai a koe, kua falanaki lahi e tau tagata ki a koe.”—Caiman.
MATAPATU FAKAAKOAGA HE TOHI TAPU: “Kua loto a mautolu ke mahani mitaki ke he tau mena oti kana.”—Heperu 13:18.
Tua ki ai. He taha kumikumiaga i Amerika, ko e 78 e pasene he tau tagata gahua ne falanaki ki ai “ko e taha he tau mena tolu ne mua e aoga ke moua e gahua.” He fakaako ke tua ki ai mogonei, to aoga ki a koe ka lahi.
“Mailoga he tau matua haaku ka fakamooli au he taute e tau fekau ka e nakai fakahohā tumau a laua ki a au. Ka lahi e fakakite pihia e au, to falanaki lahi e laua au.”—Sarah.
MATAPATU FAKAAKOAGA HE TOHI TAPU: “Kua tua ke he hau a omaoma mai, kua iloa e au to eke e koe e tau mena ke mua ke he tau mena kua tala atu ai e au.”—Filemoni 21.
Kia fakauka. Nakai tuga e tupu he tino ne mafiti e falu ke kitia, fa fai magaaho to mailoga he falu e motua he logonaaga mo e manamanatuaga.
“Nakai taha ni e gahua ka falanaki e tau matua po ke falu ki a koe. Ka e maeke a koe ke feaki fakahaga ai ka fakatumau a koe ke fakamooli.”—Brandon.
MATAPATU FAKAAKOAGA HE TOHI TAPU: “Kia fakatapulu a mutolu ke he . . . fakauka.”—Kolose 3:12.
Liga Manako Foki a Koe
VITIŌ NE TĀ E TAU FAKATINO
Tutala Fēfē Au ke he Tau Matua Haaku?
Tutala fēfē a koe mo e tau matua haau ka e nakai manako a koe ke tutala?
