AU MAPU
10: Irinakiia
EAA TE AITEANGA
Ko te aronga irinakiia ka marekaia ratou e to ratou metua, au oa, e to ratou au pu angaanga. Ka aru ratou i te au ture, ka akono i ta ratou i taputou, e ka akakite ua rai i te tika.
EAA I PUAPINGA AI
No te au angaanga tei rauka ia koe i te rave, e pirianga to te reira ki te tu irinakiia tei rauka ia koe.
“Ko te ravenga meitaki roa atu kia irinaki toou nga metua ia koe, koia oki kia akaari koe i te tu pakari e te tu akono, me tei reira raua e me kare.”—Sarahi.
KAVEINGA PIPIRIA: “E akara matariki ia kotou uaorai.”—2 Korinetia 13:5.
TAAU KA RAVE
Me ka inangaro koe kia irinaki maataia me kore kia akatupu akaou i te irinaki, ka tauturu teia au ravenga ia koe.
Akakite i te tika. Kare te tangata e irinaki ia koe me ka akakite ua koe i te pikikaa. Me akakite ua koe i te tika e kare e uuna i toou au tarevake, ka irinaki mai tetai ke ia koe.
“Ka māmā ua i te akakite i te tika me te meitaki ua ra te au mea katoatoa. Inara me akakite koe i te tika noatu ka akaraanga kino koe, ka irinaki maata mai te tangata ia koe.”—Caiman.
KAVEINGA PIPIRIA: “Ei akono meitaki ta matou i te au mea katoa nei.”—Ebera 13:18.
Akaari i te tu irinakiia. I roto tetai kimikimianga i Marike, akakite e 78 patene o te aronga kimi aronga angaanga e ko te tu puapinga rava atu e rauka ai tetai angaanga, ko te tu irinaki. Me akaari koe i te tu irinakiia i teianei ka puapingaia koe me mamaata mai koe.
“Me rave au i taku angaanga e me kare toku nga metua e akamaara ua mai iaku ka kite mai raua i toku tu akono. Me akaari ua rai au i teia au tu, ko te maata atu ïa to raua irinaki iaku.”—Sarah.
KAVEINGA PIPIRIA: “Te irinaki nei au i toou akatika anga mai . . . kua kite oki au e e maata atu rai taau i taku e pati nei.”—Philemona 21.
E akakoromaki. Ka kite mai te katoatoa me mamaata mai koe, inara ko te tupuanga o te pae manako e te ngakau ka anoanoia tetai tuatau e kiteaia ai te reira.
“Kare toou nga metua e tetai ke e irinaki ia koe me rave koe e okotai angaanga meitaki. Inara ka rauka ia koe i te akatupu i te reira me akaari ua rai koe i te tu akono.”—Brandon.
KAVEINGA PIPIRIA: “E tenana, ka akangakau aroa ua . . . [e] te akakoromaki.”—Kolosa 3:12.
Ka Reka Katoa Koe i Teia
TEATA TORŌIA
Akapeea au me Tuatua ki Toku Nga Metua?
Akapeea koe me tuatua ki toou nga metua noatu kare koe e inangaro ana?
